Meeqqat atugaat: Kalaallit Nunaat Danmarkilu aaqqiissutissat pillugit suleqatigiilersut
Danmark aamma Kalaallit Nunaat suleqatigiissitamik pilersitsillutik ullumi atsioqatigiipput. Suleqatigiissitap akimortumik suleqatigiiffiusussap meeqqat inuusuttullu Kalaallit Nunaanni inuunerminni atugaasa pitsanngorsaaviginissaa siunertaraa.
Peqqissutsimut, Isumaginninnermut Inatsisinillu atuutsitsinermut Naalakkersuisoq, Martha Abelsen (S) aamma isumaginninnermut nunallu iluanut tunngasunut ministeri Astrid Krag (Soc) kalaallit qallunaallu akornanni suleqatigiissitassaanik pilersitsillutik atsioqatigiipput. Suleqatigiissitap Kalaallit Nunaanni meeqqat inuusuttullu atugarliortut atugaasa pitsanngorsarnissaannik suliaqassaaq.
Tamanna pivoq sisamanngornermi tusagassiortunik katersutsitsinermi.
Suleqatigiissitap danskit naalakkersuisuinut Naalakkersuisunullu decemberimi siullermeerlutik nalunaarusioqqaassapput, nalunaarusiarlu innersuussutinik aaqqiissutissatullu siunnersuutinik imaqartoq 2020-imi ukiup affaata siulliup naannginnerani tunniunneqassalluni.
Suleqatigiissitaq suliassat naammassineqarnissaanut akisussaaffimmik tigummisuussaaq:
- Siulittaasoq – isumaginninnermut inatsitsisinillu atuutsitsinermut naalakkersuisoqarfimmit aamma social- aamma indenrigsministeeriaqarfimmit ataatsimoorunneqassaaq
- Isumaginninnermut inatsisinillu atuutsitsinermut naalakkersuisoqarfimmit sinniisoq ataaseq marlulluunniit
- Social- aamma indenrigsministeriaqarfimmit sinniisoq ataaseq marlulluunniit
- Justitsministeeriaqarfimmit sinniisoq ataaseq marlulluunniit
Allattoqarfimmit ataatsimoorussamit suliaq ataqatigiissarneqassaaq.
Danmark aningaasaleerusuppoq
Isumaginninnermut nunallu tunngasunut ministeri tusagassiortunik katersortitsinermi erseqqissaavoq danskit naalagaaffiat Kalaallit Nunaannut ikiuutitut 80 milliuunit koruuninik aningaasaliinissaminut piareersimasoq. Aningaasat Kalaallit Nunaanni meeqqat inuusuttullu atugarliortut atugaasa pitsanngortinnissaannut atorneqassallutik. Tamanna Folketingimi taperserneqassappat aningaasat Kalaallit Nunaannut ukiuni sisamani tulliuttuni tunniunneqassapput.
Sulineq pingasunut avinneqassaaq
Sulinermi suliassat allattorsimaffiat malillugu aaqqiissutissanik suliaqarnermi kommunit tallimaasut peqataatinneqassapput.
Sulineq pingasunut avinneqassaaq:
- Pissutsit meeqqamut pingaarutillit
- Pissutsit inersimasunut, atornerluisunut, sumiginnaasunut ilaalu ilanngullugit pingaarutillit
- Pitsaaliuinermik atituumik suliniuteqarneq
Isumaginninnermut suliassaqarfiup ataani suliniutit kisiisa, aamma atitunerusumik suliniutit, meeqqat sumiginnarneqarnerannik pitsaaliuisinnaasut qanimut isiginiarneqarnissaat pisariaqartinneqarpoq.
-Assersuutigalugu isumaginninnermut siunnersortinik ilinniagaqartitsinermut, ilaqutariit pitsaanerusunik inissaqartitsinissaannut, meeqqap angajoqqaavisa suliffissaqarnerup iluani pitsaanerusumik inissisimalernissaannut, allassimavoq.
Meeqqap qaniginerpaasaata saniatigut kinguaassiutitigut pinerliisartut inersimasullu meeqqanik sumiginnaasartut katsorsarneqarnissaannut suliniutissanik qulaajaasoqassaaq. Pitsaaliuinermillu suliaqarnermi sumiginnagaasimanerup kinguaassiutitigullu pinerlineqarsimanerup paquminartuujunnaarnissaanut paasissutissiissutinik suliaqartoqassalluni.