Meeraanerujartuinnartut inuit attaveqaqatigiittarfiinik atuisalerput
Meeraanerujartuinnartut allaat 9 - 12-inik ukiullit Facebookimi imaluunniit allat inuit attaveqaqatigiittarfiiniittalerput
Inuit attaveqaqatigiittarfii europamiut nalinginnaasumik qangali aalajangersimasumik atugarisalerpaat. Kisianni aamma meeqqat amerliartuinnartut Facebook allallu inuit attaveqaqatigiittarfii atugarisalerpaat - namminneq inuunerisaminnik qanoq illersorneqarnissartik ilisimaqqaarnagu.
Taamatut takutitsivoq EU-Kommissionip aamma attaveqaqatigiittarfiup EUKidsOnlinep nalunaarusiaat nutaaq.
Europami meeqqat 9 - 12-inik ukiullit 38 procentiisaa attaveqaqatigiittarfinnik atuisartuupput, tamanna meeqqat 13 - 15-inik ukiullit akornanni 77 procentiulluni. Ingammik hollandimiut meeqqat atuiaarnerusarput.
Hollandimiut meerartaat 70 procentit 9 - 12-inik ukiullit oqarput namminneq atuisartuullutik. Tamanna 13 - 16-inik ukiulinnut 87 procentiuvoq. Aamma danskit meerartaasa attaveqaqatigiittarfinnik atuisarnerat kisitsisinngorlugu EU-mi agguaqatigiissillugu atuisartunit qaffasinneruvoq.
Danmarkimi 58 procentit 9 - 12-inik ukiullit attaveqaqatigiittarfimmik atuisuupput, tamanna 13 - 16-inik ukiulinni 89 procentiusoq.
Tamannali EU-Kommissionimi siulittaasup tullianit digitalit pillugit akisussaaffeqartumit Neelie Kroesimit aarlerinartutut isigineqarpoq, misissuisitsinerup takutimmagu meeqqat sisamararterutaat kikkunnit tamanit takuneqarsinnaasunik attaveqaqatigiittarnermik atuisuunerat.
- Attaveqaqatigiittarfiit meeqqanit amerliartuinnartunit alakkarneqartarput, kisianni amerlasuut onlinekkut imminnut eqqarsaatigalutik illersuutissarsiorneq ajorput.
- Attaveqaqatigiittarfiit tamarmik massakkorluinnaq isumagisariaqarpaat minnerit attaveqaqatigiittarfinniinnerat taamaallaat namminneq akuerisaminnit attaveqaqatigisartakkaminnit ujarliutinillu anguneqarsinnaanngitsumik takuneqarsinnaasunngortinnissaat, EU-kommissæri taamatut oqarpoq.
Attaveqaqatigiittarfiit amerlasuut EU-Kommissionimut neriorsuereerput onlinekkut meeqqat 18-it inorlugit ukiullit illersorneqarnissaat sakkortusiniarlugu. Kommissionip piffissaq sivisunngitsoq qaangiuppat tamanna piviusunngortissimanersoq misissorniarpaa.
Taamatut Ritzau allaaserisaqarpoq.