imip pitsaassusaa
Mianersoqqussut: Nuummi qalatitseqqusineq annertusineqartoq
Najugaqarfinni imermik qalaatitseqqaaqqusinermik inassuteqarneq oqartussat annertusisariaqalersimavaat. Bakterissanik nassaarneq uumasut miluumasut inalugaanni uumasuneersuusinnaasut , inunnik napparsimalersitsisinnaapput.
Nuummi Nuukullammi, Jagtvejimi, Kujallerpaani, Aqqusinersuarmi, Niels Hammekensvejip ilaani aamma Sanavejip ilaani najugaqartut suliffeqarfiillu imermik qalaatitseqqaarnissaannik sakkortuumik inassuteqarfigineqarput.
- Najugaqartunut suliffeqarfinnullu imermik qalatitseqqussut 8. september 2017-imeersoq suli atuutiinnarnissaa innersuussutigineqarpoq. Qalatitsequssut maanna aamma Niels Hammekensvejip ilaani Sanavejillu ilaani najugaqartunut ullumi aamma atuutsinneqalerpoq, oqartussat allapput.
Imermik misissuinermi coliformebakterianik, bakteriat uumasut miluumasut inalugaanni uumasuneersuusinnaasut mingutsitsinerannut takussutissanik nassaartoqarpoq.
Bakteriat taakku inunnik napparsimalertitsisinnaapput. Imeq qalaanneqarpat napparsimalissutaassanngillat. Taamaattumik imermik misissuinerup naammaginartumik inerneqarnissaata tungaanut qalaassinissamik innersuussutip atuutiinnarnissaa inassutigineqarpoq.