CV-mik kusassaaneq
Michael Binzer kusassaasimanini pillugu: Kanngusuppunga
Michael Binzerip kukkuluttuutigisani maanna aliasuutigai
Pisortaanerusimasup Michael Binzerip sisamanngornermi nassuerutigaa ilinniakkaminut nalunaarsuisarfini kusassartarsimallugit. Nittartakkamini ataasinngornermi allappoq aliasuutigalugit kanngusuutigalugillu
Tele-Postip siulersuisui pisortaanerusimasumut Michael Binzerimut isumaqatigiissutiminnik atorunnaarsitsiniarlutik sapaammi aalajangerput. Taamatuma kingorna pisortaanerusimasoq soraarniuteqarnermi nalaani qaammatip qulit missaani aningaasarsiaqassanngilaq.
Tamannalu pivoq Michael Binzerip 2012-imi atorfinitseqarnermi nalaani ilinniagarinerarsimasami marluk eqqunngitsuunerata saqqummiunneqarnerisa kingorna.
Atuaruk: Pisortaanerusimasumik Binzerimik isumaqatigiissut Tele-Postip atorunnaarsippaa
Michael Binzer maanna aliasuttorujuuvoq
- Aliasuutigivakka iliuuserisimasakka aamma inuit pakatsitakka aliatsatsitakkaluunniit tamaasa utoqqatserfigivakka.
Taama Michael Binzerip blogimini ataasinngornermi allalluni aallartippoq.
- Isumaqanngilanga ‘nunatsinni pissutsit immikkut ittut’ uani naammassisaqarsimannginnermut utoqqatsissutitut atorneqarsinnaasut. Soorlu nunap pissaritai naammannartut, inukissusaa imaluunniit angalaniarnikkut aqqutit ajornarneri nassuiaatitut atorneqarsinnaanngillat anguniakkanut angusinissamut ajornartorsiuteqarsimagaanni.
- Suli taama isumaqarpunga. Kisianni sooq sungiusaasutut naammassinnissimananga 29-nik ukioqarlunga allassimannginnerlugu aamma ilinniakkanut nalunaarsuiffinnut sooq kusassaasimanerlunga eqqarsaatigivara, immaqa suliffittaassannut siullermut alloriarniarlunga taamaaliorsimavunga immaqaluunniit angorusutama naliliisinnaanera taamani innarlersimavaa.
- Akissutissaa nalunngitsuugukku uani allassangaluarpara. Kisianni naluara. Utoqqatsissutaanngilarli inuusuttuunera angusaqarusunneralu. Kisianni 29-nik ukioqarlunga imminut aperigaluaruma akissutissaa nalussanngikkaluarpara.
Sungiusaasutut ilinniakkaminut aamma amigaateqarpoq
- Ilinniakkanut nalunaarsuiffinni kusassaallunga ilinniagarisimanngisakka ilannguttarsimavakka. Ullumikkut tamanna assut kanngusuutigaara. Aamma sungiusaasutut ilinniarninnut ukiup affaa amigaatigaara, tamannalu aamma nalunaarsuiffimmi allassimavara naammassisimasutut. Soorunami naammassisimanagu allassimasussaangaluarpara. Tamanna peqqissimissutigeqaara.
- Kisianni ilinniakkat taakkorpiaat ukiut 15-it matuma siorna atorfittaannut tunngaviliisuunersut naluara, aamma qularaara. Assigiinngitsutigummi misilitseqattaarpunga angusiffigisannik tamanik atorfinitsinneqannginninni. Nassuiaanerunngilaq paasissutissiineruinnarporli.
Atuaruk: Binzerip peqquserlussimanera norskinit pakatsissutigineqarpoq
Paasissutissanik nutarterisimannginnini peqqissimissutigigaa
Michael Binzer taama oqaluttuarpoq, taanna isumaqarpoq timersornikkut angusarisarsimasani anguniagaqallaqqissutsinilu atorfittaaminut siullermut tunngaviliisuusimasut:
- Isumaqartuaannarnikuuvunga timersornikkut angusakka anguniagaqartarneralu suliffittaannut siullermut tunngaviliisuusut. Immaqa ulapippallaarsimavunga ukiuni siullerni amerlasuunit, allaat siumuinnaq tunumuunngitsorlu isigilersimallunga.
- Qangarsuarlimi ilinniakkanut nalunaarsuiffinni allassimasut nutartersimasussaangaluarpakka, tassami pisortatut ilinniaqqinnerit ingerlannikuuakka kingornalu suliffigisarsimasanni misilittagaqalerlunga.
- Nalligequsaanngilanga. Inuusuttuuninni kukkusimavunga ullumikkut kinguneqartinneqartumik. Tamanna ajunngilaq.
- Kisianni aamma meeqqat atuarfianni suliniutinut tunngasunik suliaqarpunga. Suliniutit taakkua pingaarnerat annikillinngilaq inuttut siusinnerusukkut kukkorujussuarsimagama. Taamaammat suliniutini ukunani aqutsisuusutt suli atorsinnaappannga, taava neriuutigivara allannguinissamut tapertaasinnaanera. Kisianni taakkua aalajangissavaat.
Atuaruk: Svend Hardenberg: Saaffiginnittoqarmat misissuivugut
Tusassiuutitigut saqqummerusunngikkallarpoq
Tamatuma saniatigut Michael Binzerip oqaluttuaraa Tele-Postimit atorfeqarnernini atorunnaarsinneqarnissaa pillugu attaveqarfigineqarsimanani, namminerlu aatsaat sapaammi tusagassiuutitigut paasitinneqarsimalluni.
- Sukkulluunniit toqqorterniarsarinngilanga imminulluunniit pinngitsuutinniarsaralunga. Aamma tusagassiuutinut toqqortinngilanga, kingusinnerusukkut saqqummerumaarpunga, Michael Binzer tusagassiuutinut ataasinngornermi taama aamma nalunaaruteqarpoq.
Michael Binzerip blogimini aamma ilinniakkaminut nalunaarsuiffik kusassagaq kusassagaanngitsorlu saqqummiuppaa.
Atuaruk: Michael Binzer: Annertuumik kukkuluttorpunga