bingo
Millioninik arlalinnik eqquisoq
Angut kalaaleq siornatigut angerlarsimaffeqarsimanngitsoq kiliortakkanik eqquiniaanermi eqquerujussuartoq
Angut 37-nik ukioqartoq Føtex-imi kiliortakkami eqqukkani nuannaarutigai sapaatip ullaani. Tassami tassani paasivaa qaammatini tulliuttuni 60-ni qaammatit tamaasa 60.000 koruuninik aningaasarsisassagami, katillugit 3,6 million koruuninik naleqarpoq.
- Ulloq eqqumiitsorujussuuvoq, pisoq paasisinnaanngingajappara. Bankimeeqqammerpunga eqqugaralu akuersiteqqammerlugu. Eqqumiitsorujussuuvoq kisianni misigisaq nuanneqaaq, eqquisoq kinaassutsiminik isertuussisoq dagbladet Sjællandske-mut oqarpoq nangillunilu:
- Kiliortagaq tallimanngormat pisiaraara, sapaammi aatsaat misissorlugu. Ikinngutera eqqumiillilaarpoq. 3,6 million koruuninik eqquivunga. Juullimi assut tunisilluarpunga.
Millionerinngoqqammersup juullikkunni ukiutoqakkunnilu Nunatsinniinnissani naatsorsuutigaa. Aningaasat aamma qanoq atorniarnerlugit pilersaaruterpassuaqarpoq.
- Silatusaartumik atorneqassapput. Imaassinnaasoq illusisunga, Sjællandskemut oqarpoq, ilaatigullu aamma oqaluttuaralugu angerlarsimaffeqarnikuunngikkaluarluni.
- Angerlarsimaffeqanngitsuuvunga qammatini arfinilinni. Maannakkut angisuumik ineqarpunga.