Misissuisimaneq: Politiit pitsaanerusumik ikiorserneqarusuttut
Politiit pineqaatissinneqarsimasunullu inissiisarfinni sulisut sulinerminni misigisartakkaminut atatillugu tarnip pissusaanik ilisimasalimmit aaqqissugaanerusumik ikiorserneqartarnissartik kissaatigaat.
Politiini pinerluuteqarsimasunillu isumaginnittoqarfimmi sulisut sulinerminni tarnikkut annertuumik artukkerneqartarput.
VIVE-p - Danmarkimi nuna tamakkerlugu atugarissaartuunermik ilisimatusarfiup misissueqqissaartarfiullu misissuisimanerata saqqummiunneqaqqammersup tamanna takutippaa.
Assersuutigalugu pinerluuteqarsimasunik isumaginnittoqarfimmi sulisut 28 procentii sulinerminniut atatillugu minnerpaamik ataasiarlutik inuunerminnik ulorianartorsiorlutik misigisarsimavaat.
Politiit 38 procentii inuunerminnik ulorianartorsiorlutik misigisarsimapput, assersuutigalugu aallaammik igiffigineqarnermikkut, sakkulimmit saassunneqarnermikkut ulorianaateqartumillu ajoqusernermikkut.
66 procentit nakuuserfigineqarsimasut
Politiit 66 procentii aamma sulinerminni nakuuserfigineqarsimapput.
Misissuisimanerup tamanna takutippaa.
Politiini sulisut 14,6 %-ii akulikittumik tamatigulluunniit stressertutut misigisarsimapput, 9,5 %-iilu PTSD-mik - Post Traumatic Stress Disorder - atugaqarlutik.
Pinerluuteqarsimasunik Isumaginnittoqarfimmi sulisut 33,3 %-ii akulikittumik tamatigulluunniit stressertutut misigisarsimapput, 24,3 %-iilu PTSD-mik - Post Traumatic Stress Disorder - atugaqarlutik.
Pissarsiffik: VIVE
Politiini pinerluuteqarsimasunillu isumaginnittoqarfimmi sulisut annertuumik artukkerneqartarsimagaluarlutik aaqqissuussat atuuttut naammagisimaarpaat, assersuutigalugu peqqarniitsumik pisoqarsimatillugu tarnip pissusaanik ilisimasalimmit ikiorserneqartarnertik naammagisimaarpaat.
Politiilli pinerluuteqarsimasunillu isumaginnittoqarfik sulisunut ikiuunnerusinnaasut, misissuisimanerup takutippaa.
Piffissaalatsisarneq
Politiitut atorfillit 31 procentiisa misigisarsimavaat, suliassanik allanik aallartitsisinnatik misigisimasatik peqqarniitsut suliarinissaannut piffissaqarpallaartoqartannginnera imaluunniit piffissaqanngingajavittoqartarnera.
Nalunaarusiaq naapertorlugu tamatumunnga pissutaatinneqarpoq, Kalaallit Nunaanni politeeqarfippassuit mikivallaarnerat, taamaammallu politiitut sulisorineqartut taakkuinnaasut suliassanut tamanut orniguttarnerat.
Pinerluuteqarsimasunik isumaginnittoqarfimmi sulisut 44 procentiisa misigisarsimavaat, misigisimasat peqqarniitsut suliarineqarnissaannut piffissaqartoqarneq ajornera.
- Tamatumunnga pissutaavoq, inissiisarfinni sulisut amigarnerat, taamalu sulisut immikkut tatineqartarnerat, nalunaarusiami allassimavoq.
Pisortat ajornartorsiutinut tunngatillugit ilisimaarinnittut
Misissuinermit paasineqarallarsimasut ukioq manna siusinnerusukkut saqqummiunneqarmata, Pinerluuteqarsimasunik Isumaginnittoqarfimmi pisortap Naaja Nathanielsenip nalunaarutigaa, pinerluuteqarsimasunut inissiisarfinni sulinermit atukkat isumaginnittoqarfimmit misissorneqassasut.
Ilaatigut suliffik nutaamik nalilersorneqassasoq, ajornartorsiut erseqqissaaffiginiarlugu.
Politiinut tunngatillugu politimesterip Bjørn Tegner Bayip oqaatiginikuuaa, upalungaarsimaneq sapinngisamik politiinut ikiuutaasussaq eqqumaffigalugu.