Mitaarneq alutorineqartoq
Kunngit pingasuni mitaarnermik ileqqu Sisimiuni atorunnaarneqariartorpoq. Taamaammat nutaamik aqqutissiuisoqarpoq
Illoqarfiit tamarmik immikkut ileqqulersorfiusarput, sumiiffiit ilaanni kunngit pingasuni mitaartarneq suli saqqumilaaqaaq.
Ukiut kingulliit Sisimiormiut malugisarsimavaat mitaartarneq annikinnerulersimasoq, soorluttaaq silatangiaasarneq aamma tammariartortutut isikkoqartoq. Nunatsinni illoqarfiit annersaasa aappaanni juullikkunni silatangiaasarneq aamma akuttortikkiartorpoq.
Ileqqut attannissaat pingaaruteqarpoq - arlaatigut qanoq iliorluniluunniit, Arnajaraq Støvlbæk, piorsarsimassutsikkut illorsuarmi Taseralimmi pisortaaneq oqarpoq.
Taamaattumik peqatigiiffiit Taseraliullu ukiut aappassaa mitaartunik unammisitsilerpoq, tamannalu pissaaq tallimanngorneq, 6. januar nal. 19.00 Taseralimmi.
Siorna 2011-imi mitaartunik unammisitseqqaarneq Taseraliup paarliani pisimavoq inussiffiulluartumik, allaat tattoqaisaaffiusimalluni.
- Taamaattumik ukioq manna mitaartunik unammisitsineq inersuarmi filmertarfiusumi ingerlanneqassaaq. Dommeriussapput peqatigiiffinnit aallartitat pingasut: Klaus Filemonsen (kalattoortartut), Ingerborg (sanaluttartut) kiisalu Hans Mathiassen (break dancertartut). Point-inik kisitsisuussaaq aqutsisuussallunilu Otto Mika, erinarsoqatigiit Sikkersuni ilaasortaq, Arnajaraq Støvlbæk oqarpoq.
Mitaartut kinaanerminnik oqarneq ajormata unammeqataasussat normumik tunineqarumaarput. Ajugaasoq kiisalu 2-nngortoq 3-nngortorlu eqqugassaqarumaarput.
- Unammereernermi illoqarfimmi mitarrattoqassagunaqimmat angalaarnissaq annilaanganannguarsi, Arnajaraq Støvlbæk mianersoqqusivoq.
Isiginnaarneq peqataanerlu akeqanngilaq, mitaarusuttut unammeqataarusuttullu tamarmik tikilluaqqusaapput.