Mittarfiit: Illuatungiliuttut danskit itigartitsisinnaanerat isornartorsiorpaat
Naalagaaffiup Air Greenlandip piginneqataaffiginninneranit ajornartorsiutit ilinniutigineqarsimanngitsut, IA isumaqarpoq.
Ingerlatseqatigiiffiit pisortanit pigineqartut avillugit pigineqarnerannut tunngatillugu, Naalakkersuisut ilikkagaqarsimanngillat. IA-mi siulittaasoq, Múte Bourup Egede, KNR-imut taama oqarpoq.
Air Greenlandimi misilittakkanut taanna innersuussivoq, tassani SAS aamma naalagaaffik taassuma oqarnera naapertorlugu soqutigisatik malillugit sullipput.
Kalaallit Airport Internationalimi aalajangiinernut annertuunut naalagaaffik itigartitsisinnaatinneqarnerani, tamanna eqqarsaatigineqarsimasariaqaraluarpoq.
- Misilittakkagut imaapput, assersuutigiinnavillugu Air Greenlandimi ineriartortitsinissamik siunnerfeqarnermi piginneqataasunit unikaallatsitsisinnaasarneq. Taanna arlaleriarlugu misilittagaqarfigineqarpoq. Ilaatigullu tassa taannaavoq massakkut misigisarput, helikopterinik immaqa ullutsinnut naapertuukkunnaavissimasunik atuineq, Múte Bourup Egede, KNR-imut oqarpoq.
IA suleqataaniarpoq
Taamaattorli pingaarutilimmik assigiinngissuteqarput, Namminersorlutik Oqartussat Air Greenlandimi ikinnerussutilinnik 37,5 procentinik aktiaateqarput. Kalaallit Airport Internationalimi pissutsit killormoorput, tassani Namminersorlutik Oqartussat marluk pingajorarterutaannik amerlanerussuteqarput.
Isumaqatigiissut danskit naalagaaffiat peqatigalugu amerlanerussuteqartunit aalajangerneqarneranut innersuussuteqarluni, IA isornartorsiuigaluarluni suliniutip piviusunngortinneqarnissaanut suleqataaniarpoq.
Akerlianik Partii Naleqqap tunngaviusumik akerliuninik attappaa.
- Danmark ineriartortitsinissanut tamanut itigartitsisinnaappat,
taava kalaallit suliniutaattut taassallugu pisariaqanngitsoq isumaqarpunga, Pele Broberg, KNR-imut taama oqarpoq.
Piginnittuunermut isumaqatigiissutaavoq, Kalaallit Airports Internationalimi siulersuisunut ilaasortanit arfiniliusunit marluk naalagaaffiup toqqassagai. Tamatuma saniatigut ’ingerlatseqatigiiffiup niuernikkut suliaani malunnaatilimmik allannguinerit’ naalagaaffiup itigartitsissutigisinnaavai, aktianik tunisineq kiisalu naalagaaffiup aningaasaliissutigisaannut malunnaatilimmik aalajangiinernut.