Inatsisartut
Mittarfiit, innarluutillit tunngaviusumillu inatsik oqallisigineqassapput
Inatsisartut ukiaanerani ataatsimiinnerminni oqaluuserisassat 111-it oqaluuserissavaat
Inatsisartuni ilaasortat ukiaanerani ataatsimiinnermi ulapingaatsiartussaapput. Inatsisartunit oqaluuserisassatut siunnersuutigineqartut 62-it oqallisigineqassapput, Naalakkersuisut oqaluuserisassatut siunnersuutaat 42-t oqaluuserineqassallutik.
Inatsisartut siulittaasuata Lars-Emil Johansenip tusagassiuutinut tamanna nalunaarutigaa.
Partiinit 71-it siunnersuutigineqarput.
Innarluutillit
Mittarfissat siunnissami pilersinneqarniartut oqaluuserineqangaatsiartussaagaluartut, innarluutillit pillugit aamma oqallinnerit ikinnavianngillat.
Innarluutillit pillugit oqallinnerit sisamaassapput.
Tunngaviusumik inatsisitaarnissaq pillugu oqallittoqartussaavoq aamma. Ilaatigut aamma ikiaroornartumut inatsit, akileraartarnermut inatsit assigiinngitsullu allat oqallisigineqassallutik.
Inatsisartut ukiaanerani ataatsimiinnerat septembarip 25-ani ammarneqassaaq. Ataatsimiinneq decembarip aappaani naammassineqartussatut naatsorsuutigineqarpoq.