Moriusami najugallit marluinnanngorput
Nunaqarfiup siunissaa sapaatip akunnerata tulliani Naalakkersuisut naliliiffigissavaat.
Arfiniliugaluarput, taava sisamanngorput maannalu nunaqarfimmi najugallit marluinnanngorput. Moriusami issaannannguaq toqutsisoqareernerata kingorna nunaqarfiup inui marluinnanngorput. Tamatuma siorna nunaqarfimmi najugaqartutut allassimasut marluk qangali Qaanaamut nuupput, taamaasilluni inuit marluk Moriusami nunaqartutut oqaatigineqarsinnaapput.
- Ilumoorpoq uanga borgmesteritut Moriusap siunissaa pillugu Ineqarnermut, Attaveqarnermut Angallannermullu Naalakkersuisoq Jens B. Frederiksen oqaloqatigigiga, Qaasuitsip Kommuneata borgmesteria Jess Svane (S) radioavisimut oqarpoq.
Jens B. Frederiksenip Moriusap siunissaa pillugu erseqqinnerusumik oqaaseqarumanngilaq, paasissutissiillunili naalakkersuisut tulliani ataatsimiinnissaani Moriusaq pillugu oqaluuserisassaqarlutik. Naalakkersuisut sapaatit akunnerata tulliani ataatsimiissapput.