MSC-mut nalilersuut Naalakkersuisut pissutaallutik annaaneqarsinnaasoq
Nipisat suaanik tunisineq matuneqarallareersoq Naalakkersuisunit maanna tunisineq ammarniarneqarpoq sumiiffinni assigiinngitsuni. Tamanna pissutaalluni MSC-mik nalilersuut annaaneqarsinnaavoq, aningaasanik aamma naleqarsinnaalluni
Nipisat suaanik tunisineq Naalakkersuisunit immikkoortortaqarfinni 1C-mi aamma 1D-mi matuneqarpoq maajip arfineq aappaani. Pisassat pisarineqareerneri pissutaalluni immikkoortortaqarfiit Nuuk aamma Maniitsoq tunisisinnaajunnaarlutik. Royal Greenlandimut suli tulaassisoqarsinnaanngilaq.
Royal Greenlandip piffissami sivikitsumi ammaassissasoq Jens K. Lyberth Sermitsiaq.AG-mut ilisimatitisivoq. Aalisartoq ataaseq nappartanik marlunnik tunisisinnaasoq ilisimatitsissutigaa. Pisassarititat amerlineqarnissaat Royal Greenlandimit kissaatigineqanngitsoq naqissuserpaa, taamaasiortoqassappammi MSC-mik nalilersuut annaaneqarsinnaasoq oqaatigineqarmat.
Nuummi immikkoortortaqarfimmi 321 tonsinik pisassiisoqarpoq. Maajip arfineq aappaani 371 tonsit tulaanneqarsimapput, maajip 13-ani 394 tonsit tulaanneqarlutik.
Maniitsup immikkoortortaqarfiani 255 tonsinik pisassiisoqarpoq. 296 tonsit maajip arfineq aappaani pisarineqareersimapput, 13-ani 308 tonsit pisarineqarsimallutk.
Polar Seafoodimut aamma tunisisoqarsinnaanngilaq.
- MSC-mik nalilersorneqarnerput annaajumanagu pisassat qaangerlugit tunisisoqareernerata kingorna ammaarusunngilagut, Polar Seafoodimi siulersuisunut siulittaasoq Henrik Leth Sermitsiaq.AG-mut oqaatigaa.
Royal Greenlandisut piffissaligaasumik tunisisoqarsinnaanissaa Polar Seafoodimit periarfissiissutigineqassaaq.
Tapersersuisoqanngilaq
Aalisarnermut suliaqartut oqaloqatigineqareernerisa kingorna tunisisinnaanermik akuersissut Naalakkersuisunit tunniunneqarpoq. Immikkoortortaqarfinni eqqartorneqartuni pisassat 105 tonsinik qaffanneqarput.
Sustainable Fisheries Greenland, nunatsinni aalisakkerinermik- tunisassiorfinnillu suliffeqarfinniik kattussuussaaq, pisassanik qaffaasoqarnera tapersinngilaa.
- Nipisat suaanik MSC-mik nalilersuisoqarnera aningaasarsiornermut iluaqutaavoq. MSC-mik nalilersuut annaaneqassappat aningaasat annaaneqassapput, tassani aalisartut aamma eqqorneqassallutik.
Pisassat amerlineqannginnissaat Sustainable Fisheries Greenlandimi sakkortuumik innersuussutigineqarpoq, taamaanngippammi MSC-mik nalilersuut annaaneqaratarsinnaanera tikkuarneqarpoq.