MSC: Naalagaaffiit sineriallit aalisapilunnertik unitsittariaqarpaat
Naalagaaffiit sineriallit pisassiissutissat pillugit isumaqatigiissuteqapallattariaqarput, aalisakkanik ikerinnaasiortunik aalisapilunneq unitsinniarlugu, MSC-mit kajumissaarutigineqarpoq.
2015-imili avaleraasartuut, ammassassuit saarullernallu pisarineqartartut piujuartitsinissamut killigitinneqartut 4,8 millioner tonsinik sinnertarsimavaat.
Atlantikup avannaata kangiani aalisakkat ikerinnaasiortut tatineqarsimapput, taammaammat aalisakkat illersorniarlugit politikkikkut iliuuseqapallattoqarnissaa pisariaqarpoq, MSC-mit oqaatigineqarpoq.
Aalisakkat nunat tamalaat aalisarfigisartagaat akimorlugit ingerlaartarput, taamaammat aalisakkat amerliartoqqitsinniarlugit, imaani aalisagaqartuarnissaa qulakkeerniarlugu pisassiissutinik agguaasarnissaq pisariaqarluinnarpoq, MSC-mit erseqqissaassutigineqarpoq.
Nunat soqutigisaat pingaarnerutinneqassanngitsut
Naalagaaffiit sineriallit Londonimi oktobarip 19-ianiit 27-anut aalisarnissamut isumaqatigiissutissanik nutaanik isumaqatiginninniarneranni aalisapiluttuartoqarnera pillugu MSC mianersoqqussivoq.
Silap pissusaata allanngoriartornerata malitsigisaanik suliassaq tamanna pisariaqarneruleriartorpoq, aalisakkammi imaata kissakkiartornera qisuariarfigisarmassuk, MSC-mit erseqqissaassutigineqarpoq.
- Nunanut aalisarfiusunut ilungersorluta kaammattuutigaarput, nunap soqutigisaanik pingaarnerutitsinnginnissaat, naalagaaffiillu sineriallit tulliani ataatsimiinneranni aalisakkanik pineqartunik nungusaataanngitsumik aqutsisoqarnissaanik imminnut pisussaaffileqqullugit, MSC Nordeuropami pisortaq Erin Priddle oqarpoq.
Nunat sineriallit arfineq-marluk
Nunat sineriallit Atlantikup avannaata kangiani saarullernarniartartut, avaleraasartoorniartartut ammassassuarniartartullu tassaapput Norge, Island, Savalimmiut, EU, Rusland, Kalaallit Nunaat Tuluillu Nunaat, Kingullertut pineqartoq 2020-mi EU-mit anigami sinerialittut naalagaaffinngorpoq.
Nunani tamalaani aalisarnermik ingerlatseqatigiiffimmit ICES-imit inassutigineqarpoq, aalisarneq nungusaataassanngippat aalisakkanut pineqartunut pingasunut pisassiissutigineqartartut appartinneqassasut.
Avaleraasartuunut, ammassassuarnut saarullernanullu 2021-mi pisassiissuutigineqarsimasut ICE-p inassutigisaanit 41%-imik, 35%-imik aamma 25%-imik annertunerusimapput.
Isumaqatiginninniarnerit ilungersunartut
2021-mi avaleraasartoortassat pillugit isumaqatigiissuteqartoqanngitsoorpoq, Savalimmiormiullu imminnut aatsaat taamak annertutigisunik 167.000 tonsinik pisassissimallutik. Savalimmiormiut ukuni arlaqartuni EU-mik Norgemillu isumaqatigiissuteqarsimapput, Tuluilli Nunaat sinerialittut naalagaaffinngormat agguaassiniarneq iluatsinngitsoorneqarsimalluni.
Savalimmiuni aalisarnermut naalakkersuisup Jacob Vestergaardip oqaatigaa, aalisakkat pingasut pneqartut pillugit pisassiissutissanik maannakkorpiaq isumaqatigiissuteqartoqanngitsoq. Aamma ilimagivallaanngilaa 2022-mi pisassiissutissanik agguaasisoqarnissaanut isumaqatigiittoqassasoq.
- Isumaqatigiissuteqarnissaq ilimanarpallaanngilaq. Tuluit Nunaata EU-llu imartaminni aalisarnissarput itigartissimavaat, tamannalu isumaqatiginninniarnissamut akorngutaavoq.
Londonimi isumaqatiginninniarnermi avaleraasartuut ulluni pingasuni isumaqatiginninniutigineqarnissaat inissinneqarsimavoq. Saarullernat ammassassuillu pillugit isumaqatiginninniarnissat ulluni ikinnerusunik ingerlanneqartussanngortinneqarsimallutik.
- Tamatuma takutippaa isumaqatigiissuteqarnissamut naatsorsuutiginnittoqarpallaanngitsoq, Jacob Vestergaard oqarpoq.