Naaja Nathanielsen Inatsisartunut sassarpoq

Naaja Nathanielsen ukiuni tallimani politikkimik suliaqanngereerluni, Inuit Ataqatigiinnut uteqqippoq, Inatsisartunullu aprilip arfernani qinersisoqalerpat qinigassanngortilluni.

- Inuusuttuuninniilli politikkimik soqutigisaqartuuvunga. Piffissat ilaanni politikkimik suliaqartut avataanit malinnaavigiinnarnissaat naammagisarpara. Piffissalli ilaanni politikkimik toqqaannartumik suliaqarusuttarpunga. Maanna misigisimalluinnarpunga tunniussaqaqataasariaqarlunga. Taamaammat Inatsisartunut 6. april qinersinissamut qinigassanngortippunga, Facebookimini allappoq.

IA-mut uterpoq

Naaja Nathanielsen martsimi 2016-imi IA-mit ilaasortaajunnaarpoq, Inatsisartunilu ilaasortaanermi sinnerani attaviitsutut sulilluni.

1.august 2016 aallarnerfigalugu Pinerluttunik isumaginnittoqarfimmi pisortanngorpoq, politikkilu tunullugu.

- Partiimit 2016-imi aninera tunngaviusumik naleqartitat assigiinngilernerannit tunngaveqanngilaq, pisumili aalajangiiffigisassani peqataaffigisinnaanngisaqarninnut tunngaveqarluni. Avissaarneq taanna ukiuni arlalinni mamissimalereerpoq, Inuit Ataqatigiillu kommunimut Inatsisartunullu qineqqusaarutaat isumaqatigilluinnarpakka, oqarpoq.

Suleqatissarsiortuussaaq

Taanna Facebookimini erseqqissaavoq qineqqusaarnerup nalaani Pinerluttunik isumaginnittoqarfimmi pisortatut oqaaseqassanngikkallarluni, suna tunuliaqutaralugu oqaaseqartarnera qineqqusaartunit paatsuungassutigineqannginniassammat.

Naaja Nathanielsen Inatsisartunut kingullermik qinigassanngortikkami, tassa 2014-imi qinersisoqarmat 470-init taajuunneqarpoq.

Qinersinermi matumani tunngavini marluk immikkut taajumavai:

- Ataqatigiitsitsilissaanga, isumaqatigiissinnaaneq suleqatigiissinnaanerlu upperigakkit.

- Politikkikkut oqallinnerni aalajangernernilu isummat assigiinngikkaluartut pitsaasumik angusaqartoqarnissaanik suleqataassaanga, pissutsit piviusut ilisimasallu qitiutillugit, allappoq.

- Isumaqarluinnarpunga nunatsinni ikippallaartugut politikkikkut qalipaaserluta illuatungersiuinnarnissatsinnut. Qinigaaffik naallugu suleqatigisinnaasatsinnik nassaarsinnaasariaqarpugut, taamaasilluta eqqissisimasumik ingerlatsilluta. Partiit arlaannaalluunniit sutigut tamatigut isumaqatigiittuaannarsinnaanngillat, taamaammat sammisat ilaat qinersinissap tullianimut inissikkallartariaqarnissaat inissaqartittariaqarparput, allappoq.

Naaja Nathanielsen Inatsisartuni ilaasortaanermini ilaatigut aningaasaqarnermut ataatsimiititaliami aamma aatsitassanut ataatsimiititaliami ilaasortaasarsimavoq.