Naalagaaffiup isertortumik paasiniaasui Nuummi pilersitsipput
Politiit naalagaaffimmi isertortumik paasiniaasui (PET) Kalaallit Nunaanni suliaqarnerulerniarput, Nuummilu sulisumik ataatsimik sulisitsilerlutik.
Naalagaaffiup isertortumik paasiniaasui matoqqalluinnartaraluartut, nittartakkakkut nutaarsiassaqartitsiviup Altinget: arktisip, paasissutissat uppernarsartissimavai.
- Nunat immallu issittut avannarliit ukiuni kingullerni soqutigineqarnerulernerisa malitsigisaanik PET isumannaassuseq pillugu siunnersortitut atorfimmik Nuummiittussamik pilersitsivoq. Taanna siunnersuisassaaq aamma PET, pisortaqarfiit, kalaallit namminersortut Kalaallit Nunaannilu Politiinik suleqateqassaaq, PET-imi attaveqaqatigiinnermik immikkoortortaqarfimmeersoq Altinget: arktisimut oqaaseqarpoq.
Sakkutooqarnikkut pissanganartorsiorneruneq
Illersornissaqarfiup Naalagaaffiup isertortumik paasiniaasartuisa ukiumut nalunaarusiaminni nalilerpaat issittumi pissanganartorsiorneq annertuseriarsimasoq. Ruslandip sakkutuuisa sumiffimmi piareersarnerulernerat pisooqataavoq.
PET-ip nittartakkamini suliassaasut ima nassuiarpai:
“Nuna tamakkerlugu isertortumik paasiniaasartutut sillimaniarnermillu suliaqartutut PET-ip suliassaraa danskit inuiaqatigiivisa akornanni kiffaanngissutsip, tamat oqartussaanerata sillimaniarnerullu navianartorsiortinneqarneranik paasisaqassalluni, pitsaaliuissalluni navialisitsisunillu naaperiaassalluni. Taakkunani aamma pineqarput Danmarkimut aarlerinarsinnaasut, aammali inuiannut danskiusunut danskillu nunani allani soqutigisaannut aarlerinarsinnaasut.”.