Naalakkersuisooqatigiilertussat amerlanerussuteqaqqassapput
Siumup Partii Naleraq, Atassut aamma Nunatta Qitornai naalakkersuisoqatigilissavai. Tamanna Sermitsiaq.AG-p paasisimavaa
Naalakkersuisooqatigiinnissamik isumaqatigiissutissatut siunnersuummik Siumut Partii Nalerarmut, Atassummut Nunatta Qitornaanullu saqqummiussisimavoq. Maannakkorpiarlu partiit taakku siunnersuut pillugu tunuliaquttaminnut tusarniaapput. Tamanna isumaqatigiinnianrermut qanittumik malinnaasumit Sermitsiaq.AG-mut ilisimatitsissutigineqarpoq.
Partiit taakku sisamaallutik ualeq manna 15:00 ataatsimiipput, ataatsimiinnerlu pivoq Siumup IA ilisimatereermagu aalisarnermut inatsisissaq pillugu isumaqatigiinniarnertik unitsinneqartoq.
Taamaalillunilu naalakkersuisooqatigiilertussat amerlanerussuteqaqqalaartut 16-nik tunuliaqutallit pilersinneqartussanngorpasipput.
Inuit Ataqatigiit, Demokraatit aammalu Suleqatigiissitsisut Inatsisartuni 15-inik inissaqarput.