Naalakkersuisoq imminut assortortoq
Aalisarnermut naalakkersuisoq Nikkulaat Jeremiassenip tusagassiuutinut nalunaarummi tunngavilersuutigisani toqqaannartumik assortorpai, tassani aalisarneq pillugu ataatsimiititaliarsuup nutaap katitigaanera pillugu Sulisitsisut isornartorsiuinerat akerlilerpaa.
Sulisitsisuni pisortap, Brian Buus Pederesenip, aalisarnermut ingerlatseqateqatigiiffissuit ilaat aalisarneq pillugu ataatsimiititaliarsuassami sinniisoqanngitsut paasisinnaanngilaa, taanna 12-inik ilaasortaqartussaavoq.
Isornartorsiuineq KNR.gl-imi saqqummiunneqarpoq, tamatumalu Nikkulaat Jeremiassen tusagassiuutinut nalunaarummik allaaserisaqarneranik kinguneqarpoq, tassanilu imminut assortorpoq.
Nikkulaap ilumuunnginneraanera
- Sulisitsisut taama oqarnerat akueriuminaatsippara, aalisarnermik ingerlatsiviit Aalisarneq pillugu Ataatsimiititaliarsuarmut sinniisuutitaqannginnerarlugit oqarmata. Aalisarneq pillugu Ataatsimiititaliarsuup sulinissaanut tunngavissiami marsip 8-anni saqqummersumi erseqqissarneqarpoq Aalisarneq pillugu Ataatsimiititaliarsuaq marsimi 2019-imi pilersinneqassasoq, kattuffiillu uku KNAPK, SQAPK, SIK, GE, NUSUKA, Kukkunersiuisartut, Pinngortitaleriffik kiisalu Grønlandsbanken ilaasortaatitassaminnik ataatsimik innersuussuteqarnerat tunngavigalugu Aalisarnermut, Piniarnermut Nunalerinermullu Naalakkersuisumit inuttalersorneqassasut. Kommunit aamma ataatsimut ilaasortassamik ataatsimik inassuteqateqassasut, Nikkulaat Jeremiassen allappoq.
Nikkulaat Jeremiassen aningaasanut inatsimmi oqaaseqatigiinnut paatsuugassaanngitsunut innersuussivoq, tassanilu tusagassiuutinut nalunaarummi ima allappoq:
Imminut assortorneq
- Aamma aningaasanut inatsimmi paatsuugassaanngitsumik allassimavoq peqataasut isumaqatigiissutigigaat Aalisarneq pillugu Ataatsimiititaliarsuaq inuussutissarsiortunit taakkulu kattuffiinit sinniisoqartumik ataatsimiititaliarsuarmik pilersitsisoqassasoq, Nikkulaat Jeremiassen allappoq.
Aalisarnermut inuussutissarsiornermik suliaqartut annertuut ilaat sinniiseqanngippata, ataatsimiititaliarsuarmi Aalisarnermi inuussutissarsiornerup iluani ingammik avammut tunisineq pillugu ilisimasat aalisarneq pillugu ataatsimiititaliarsuup sulinerani annaaneqarnissaat, Brian Buus Pedersenip ernumassutigaa.