Naalakkersuisunut apeqquterpassuit
Inatsisartuni ilaasortat aatsaat taama Naalakkersuisunut apeqquteqartigaat
2018-mi aatsaat taama Naalakkersuisunut allakkatigut apeqquteqartoqartigaaq, tassami 339-lluni paragraf 37 naapertorlugu apeqquteqartoqarpoq. 2015-mit 35-nik amerlanerupput, ukioq taanna apeqqutigineqartut amerlanerpaagaluarput.
Apeqquterpassuit
Ukioq nutaami aamma Naalakkersuisunut apeqquteqartut imaaginnavipput.
Tassami ullumi januaarip 15-ani, 37-eriarluni §37 naapertorlugu apeqquteqartoqareerpoq. Ukioq kingulleq piffissami tassani aqqaneq marloriarluni apeqquteqartoqarpoq. 2017-mi piffissap imaalinerani apeqqutit 30-it nassiunneqareersimapput.
Apeqquteqarnerpaagallartoq
Aqqaluaq B. Egede Naalakkersuisunut amerlanerpaanik apeqquteqareerpoq ukiup aallartinneranit. Arfineq marloriarluni apeqquteqareerpoq. Aappaattut inissisimavoq Partii Naleqqamit Pele Broberg, tallimariarluni apeqquteqartoq.
Apeqqutigineqartut assigiinngitsorujussuusarput - apeqqutillu, atorfilittat suleqatigalugit naalakkersuisut susassaqarfinniittut, akineqartarlutik.