Aatsitassaq
Naalakkersuisup zinkimik aqerlumillu qalluiffissaq tikeraarpaa
Múte B. Egede (IA) Citronen Fjordimi Ironbark A/S-p zinkimik aqerlumillu qalluiffissaanut Tarsarnermut tikeraaqqammerpoq
- Unammillernartut annertuut tikikkaluttuarneqarput, naleqqulluartunilli suleqateqarnikkut pilersaarutit piviusunngortinneqarnissaat iluatsissaqqaarpoq.
Aatsitassanut Naalakkersuisoq, Múte Bourup Egede, Citronen Fjordimi Ironbark A/S-p zinkimik aqerlumillu qalluiffissaanut Tarsarnermut tikeraarnerminut atatillugu tusagassiuutinut nalunaarummi oqarpoq.
Ironbark A/S-ip sinnissaasa suleqatitik China Nonfferousimeersut (China Nonferrous Metal Industry’s Foreign Engineering and Construction Co., Ltd) peqatigalugit piffimmik alakkarterineranni tikeraarneq ingerlanneqarpoq. China Nonferrousip ilaatigut Ironbark Kinami aningaasanik niuerfinni aningaasaliisussarsiornissamik ikiussavaa.
- Citronen Fjordimi aatsitassarsiornerup aallartinnissaanut ukiut marluk sisamallu akornanni ingerlaqqaarnissaat piviusorsiortutut isigaara. Tamatumani zinkip nunarsuarmi akiisa aalaakkaasumik qaffasiinnarnissaat apeqqutaassaaq, aatsitassanut naalakkersuisoq ilaatigut oqarpoq.
Aatsitassarsiorluni piiaanissamut akuersissut 2016-imi decembarip qaammataani tunniunneqarpoq. Ironbark A/S maanna suliniummut aningaasaliisussarsiuleruttorpoq, Namminersorlutik Oqartussat paasissutissiipput.