suleqatigiinniarneq
Naalakkersuisut taama suleqatigiikkuminaatsiginngitsut IA-mit oqaatigineqarpoq
Naalakkersuisut IA-llu ajornartorsiutaat tusagassiuutinit annertunaarneqartoq Inuit Ataqatigiit politikkikkut oqaaseqartartuata Naaja Nathanielsenip oqaatigaa
Inuit Ataqatigiit politikkikkut oqaaseqartartuat, Naaja Nathanielsen, tusagassiuutinut nalunaaruteqarpoq, tassani Naalakkersuisut suleqatigineqarpallaannginnerat pillugu tusagassiuutini ulluni kingullerni eqqartorneqartut oqaaseqarfigalugit.
Suleqatigiissinnaannginnerminnik isornartorsiortut, Naalakkersuisut siulittaasuat Kim Kielsen aamma IA-mit Sara Olsvig, Informationenimit apersorneqarsimanerat pillugu nittartakkami saqqummiussaqarpugut ataasinngormat.
Siumut aamma IA taama annertutigisumik isumaqatigiinngissuteqanngitsut Naaja Nathanielsenimit oqariartuutigineqarpoq.
Suleqatigiinneq nalinginnaasoq
- Naalakkersuisut maannamut qaammataannarmi atuutereerput. Inatsisartunilu ataatsimiititaliat amerlanerit sulinerminni suli aallartilluanngillat. Taamaattumik suleqatigiinnerup isasooqqaneranik naliliissalluni piaarpallaarujussuarpoq. Inuit Ataqatigiinniit naalakkersuisooqatigiit illuatungiliuttullu nalinginnaasumik suleqatigiinnissarput naatsorsuutigaarput, Naaja Nathanielsen allappoq, nangillunilu:
- Tassa imaappoq ulluinnarni suleqatigiilluartoqassasoq, pisanili ataasiakkaani illuatungeriittarumaartugut. Tassani politikkikkut assigiinngissutsigut patsisaanerusarput – tamannalumi naatsorsuutigineqarsinnaavoq. Inuit Ataqatigiit Siumullu assigiinngilagut, soorlu aamma Demokratit, Siumut aamma Atassut partiiusut assigiinngitsut pingasut. Isummatigut assigiinngissitaarneq politikkimi sulinerup ilagivaaæ.
Isornartorsiuineq uggorinngilaa
- Naalakkersuisut suleqatiginiarneri annertuumik ajornartorsiutaanngitsoq pillugu sooruna tusagassiutinut nalunaaruteqarpisi?
- Tusagassiuutini allaaserineqartut oqaaseqarfigineqarnissaat pingaartikkakku. Danskit aviisiini allaaserineqartuni kalaallit aviisiini eqqartorneqartut qanoq imminnut ataqatigiinnersut paasissutissiissutigissallugu pingaaruteqarpoq.
- Inuit Ataqatigiinnit Naalakkersuisunut isornartorsiuineranut ugguarpisi, Naalakkersuisummi tusagassiortunik katersortitsinerat januaarip arfineq aappaanni pisoq isornartorsiortareerparsi?
- Pisut isornartorsiorneqartarnerat ajorinngilara. Kisianni suleqatigiinnitsinnik tamakkiisumik takutitsinngilaq. Pituffik pillugu suliap ingerlanera iluarinngilarput. Aamma Naalakkersuisut aningaasanut inatsisaat aningaasaqarnikkut ataqatigiinngitsoq isumaqarpugut. Kisianni Nunaminerals pillugu suliami Naalakkersuisut suleqatigaavut, suliamilu isumaqatigiissumik ingerlasoqarnissaa isumaqatigiissutigalugu, Naaja Nathanielsen oqarpoq.
Politikkimi unikkallartoqarsinnaanngitsoq
- Aningaasaqarnermut aatsitassarsiornermullu naalakkersuisoq Anda Uldum oqarpoq Naalakkersuisunngortut ulluni 100-ni eqqissillutik sulisinneqaqqaartartut. IA-mit tamanna aamma periuseq malinneqassannginnami?
- Nunatsinni qinersisoqareeraangat unikaallatitsisoqartariaqanngilaq. IA Pituffik pillugu suliami, aningaasanut inatsimmi, Nunamineralsimut tunngasumi Nunattalu angallannera pillugu oqaaseqarsimanngitsuuppat politikkikkut ingerlatsinerlussimassagaluarpugut. Naalakkersuisunit siunnersuutigineqartoq utaqqimaarlugu AG-mut oqaatigisareerpara. Saqqummiunneqareerpat isummerfigiumaarparput. Politikkimi unikkallartoqarsinnaanngilaq, partiit allat aamma unikkallartarneq atugarinikuunngilaat, Inuit Ataqatigiit politikkikkut oqaaseqartartuat oqarpoq.