Oqaatsit
Naalakkersuisuusimasoq: Eqqugaasutut inissinneq taamaatinniarsiuk
Ilinniartitaanermut naalakkersuisuusimasoq Nick Nielsen (S) Siumup Inuusuttaannut isornartorsiuivoq, 'eqqugaasutullu inissisimaneq' taamaateqqullugu kajumissaaraluni
Eqqugaasutut inissinneq pitsaasuunngilaq!
Oqaatsit taakku atorlugit Nick Nielsenip allakkatigut oqaaseqaataa taama aallartippoq, taanna Kalaallit Nunaanni oqaatsit pillugit politikkimut oqallinnermi Siumup Inuusuttaasa pingasunngormata Sermitsiaq.AG-mi ilanngussaqarneranut atatillugu ilannguppoq.
'Pisuussutigineqanngilaq'
Kalaallit nunanik allanik suleqateqarusunnerannut qallunaatut aamma kalaallisut atugaanerunerat akornutaanngitsoq ilinniartitaanermut naalakkersuisuusimasoq isumaqarpoq.
- Ilinniagaqarnissatsinnut imaluunniit tuluttut ilinniarnissatsinnut qallunaat pisuussutiginngilaat, Nick Nielsen tusagassiuutinut nalunaarummini allappoq, tikkuartorlugulu akisussaaffimmik tigusinissaq pingaaruteqartoq.
Atuaruk: Politikerit: Tusagassiuutit oqaatsinik nakkutilliisunit nakkutigineqarlik
- Nunatsinni inatsisartoqarpugut, inuiattullu uagut inuiaqatigiit ingerlannissaanut akisussaaffeqarpugut! Inunnut eqqugaasutut inissisimasunik isigineq, soorlu Siumut Inuusuttaat, qasunartuusoq isumaqarpunga. Inuiaqatigiit amerlanngilagut, nunallu assigiinngitsut suleqatiginissaat pisariaqartipparput.
Oqallinneq sakkortooq
Siumup Inuusuttaaneersut Suinni Johansen aamma Steve Olsvig Sandgreen qallunaat oqaasiisa inuiaqatigiinni inissisimanerat pillugu ippassaq Sermitsiaq.AG-mi isornartorsiuinertik saqqummiuppaat.
Atuaruk: Siumup inuusuttai: Qallunaat oqaasiisa akimmisaarpaatigut
Taakkua oqallissaarutaat ilaatigut Arctic Winter Gamesimi oqaatsitigut misilittakkat pitsaasut aallaavigalugit ilanngussaq, uani nittartakkami oqaaseqarfigineqangaatsiarpoq.
Taakku isumaqataanngitsut ilagaat Nick Nielsen, qallunaat oqaasii tuluttuumut akimmisaarutaanngitsut taanna isumaqarpoq.
- Siumut Inuusuttaasa qallunaat oqaasii tuluttut ilinniarnermut akimmisaarutaasutut oqariartuutaannut isumaqatiginninngilluinarpunga, Siumumi siuttukut ilaat allappoq.
'Oqaatsit pingasuusariaqarput'
- Ilinniassagaanni oqaatsit pingaaruteqarput. Apeqqutaanngilaq qallunaatut tuluttulluunniit oqalussinnaaneq. Nunami ilinniarfiginiakkami oqaatsit atorsinnaaneri pingaartuuvoq. Nunatsinni suliffinni tamani sulisussat pisariaqartippagut, ilinniakkamik sivisunerusumik ilinniagaqarniaraanni minnerpaamik oqaatsit pingasut atorneqarsinnaasariaqarput.
Atuaruk: Partii Naleraq: Tuluit oqaasii qallunaat oqaasiinit salliutillugit
- Tamanna kalaallinut ilinniartunut kisimi atuutinngilaq. Assersuutigalugu qallunaat atuartut sivisunerusumik ilinniakkamik ingerlataqassagunik, tuluttut aamma allamiut oqaasiinik ilinniartussaapput, Nick Nielsen allappoq, taassumalu aamma tikkuarpaa, kalaallit atuartut qallunaatuumit tuluttut ilinniarnermik ajornannginnerutitsissasut isumaqarani, amerlasuut maanna oqaatsit tungaasigut angusaat naammaginanngereermata.
Atuaruk: Siumup inuusuttai: Qallunaat oqaasiisa akimmisaarpaatigut