Naartuersittartut ikilisaruminaapput
Naartuersittartut ikiliartortikkuminaaqaat, Paarisa nassuerpoq.
Kalaallit Nunaanni nuna tamakkerlugu ukiumut 900-t missarpiaannik naartuersittoqartarpoq.
Naartuersittartut amerlanerujussuat 1980-ikkunnili atugaasimavoq, kikkullu tamarmik, politikeriniit inuinnarnut, isumaqataapput naartuersittartut ikilisarneqassasut.
Tamannalumi inuit peqqissuunissaannik siunertami Inuuneritta-mi anguniakkat pingaarnerit ilagaat, naartuersittartut 2012-imi affaannanngortinnissaat anguniarneqarluni.
Anguniakkalli tamassuma angunissaanut suli ungasingaatsiartoq, Namminersorlutik Oqartussat Inuit Peqqissuunissaannut Centerimi, Paarisami, immikkoortoqarfiup pisortaa Bodil Karlshøj Poulsen isumaqataavoq.
Naartuersittartut ikiilisarniarlugit Paarisamit suliniutit nutaajunerpaat ilagaat atoqatigiittarneq pillugu KNR-mi tv-kut paasisitsiniaalluni nangeqattaartumik aallakaatitassiaq ´Nûno tutillugu´.
Suliniut alla tassaavoq "Inuusalerluni anaanaanermik ilinniarneq", tassani 9. klassimi atuartunut naalungiarsummut angajoqqaajuneq misilitsinneqarluni.
Paarisami immikkoortoqarfimmi pisortap erseqqissarpaa ´Nûno Tutillugu´-p imaluunniit inuusat naalungiarsuusaartitat ukiup ataatsip ingerlanerani naartuersittartut ikilisinnavianngikkaat.
Naatsorsuutigaali piffissaq ungasinnerusoq eqqarsaatigalugu sunniuteqarumaartut.
– Suliniutit taakkua marluk ukiup ataatsip ingerlanerani angusaqarfiunavianngillat, pissaanngasorujussuuvugulli inuusanillu suliniut qanimut nalilersorlugu malinnaaffigalugu naartuersittartut ikilissanersut takuniarlugu, Bodil Karlshøj Poulsen oqarpoq.
Naartuersittarnermik oqallinneq pillugu Sermitsiaq nr. 3-mi annertunerusumik atuarit.