Najugaqarfinni marlunni ineqarnermut akiliutit qaffassanngillat
Nuummi Blok P-mi najugallit Uummannami najugaqarfimmi najugallit ineqarnermut akiliutit qaffanneqarnerannit eqqugaassanngillat.
Siumut sinnerlugu Inatsisartuni ilaasortaq Karl Lyberth illoqarnermut naalakkersuisumut Jens B. Frederiksenimur paragraf 36-mik apeqquteqarpoq, Kalaallit Nunaanni najugaqarfiit pisoqaanerusut sorlii ineqarnermut akiliutit qaffanneqarnissaannit eqqugaannginnissaat paasiniarlugu.
Jens B. Frederiksen najugaqarfiit marluk pineqarnerarpai, tassalu Blok P Nuummiittoq, Inatsisartut Aningaasaqarnermut inatsisaat tunngavigalugu isaterneqartussaq, aapparalugulu UUmmannami najugaqarfik.
Najugaqarfiit sinnerini ineqarnermut akiliutit 3,5%, 4,7% aamma 5,5%-inik qaffassapput.
– Immikkut Salliarnaq Maniitsumiittoq taanikuuat. Tassunga tunngatillugu oqaatigisinnaavara, naalakkersuisut nutaanik illuliorfigissalllugit pisariaqartitsiunerpaat illussaaleqiffiunerpaallu salliutinniarmatigit. Illoqarfiit anginerit sisamat, pingaartumillu Nuuk illussaaleqiffiunerpaajupput. Taannalu aamma illussanik nutaanik pisariaqartitsiviunerpaajuvoq.
– Illunik aserfallajaallisaallunilu nutarterinissaq pissutigalugu ineqarnermut akiliutit qaffattariaqalersimapput. Ineqarnermut akiliutit appasinnerpaamik qaffatsinneqarsimapput nammaqatigiinnikkullu naligiissaarisoqarsimalluni. Ineqarnermut akiliutit qaffaataat inissianik peqqinnartunik peqalernissaq nungullarsimasunillu iluarsaassinissaq siunertaralugit aaqqissuunneqarsimapput, iluarsaassiuartariaqartarneq kinguaattoornerujussuarmik kinguneqalersimammat, Jens B. Frederiksen Karl Lyberthimut akissummini allappoq.