Nakorsiartut kalaaliminertorsinnaalissapput
Uumasut nakorsaannit akuersissutinik amigaateqarneq pissutigalugu Københavnimi Nakorsiartut angerlarsimaffiannut kalaaliminernik eqqussuineq unitsinneqarallarsimavoq. Ajornartorsiulli qaangerniarlugu allatut suleqatigiinnermik misiliisoqalerpoq.
Københavnimi nakorsiartut angerlarsimaffianni kalaaliminernik sassaallertoqartannginnera pillugu isornartorsiuisoqartareerpoq. Stine Egede IA-meersoq tamannarpiaq pillugu §37 atorlugu apeqquteqaateqaqqammerpoq, ilaatigut oqaatigalugu nakorsiartut angerlarsimaffianni kalaaliminernik sassaallertoqartannginnera tupaallaatigalugu.
Københavnimi Nakorsiartut angerlarsimaffiat kalaaliminernik pissarsiniartarsimagaluarpoq, apuutsinnatilli Aalborgip talittarfiani uniinnartarsimapput.
- Kalaaliminernik eqqusseriartarsimagaluarpugut, uumasulli nakorsaanit akuerineqarnissaat ajornartorsiutigisarparput. Imaanngilaq kalaaliminernik sassaallerusunngitsugut. Periarfissaqanngikkallartugununa, Susanne Olsen, Københavnimi Nakorsiartut angerlarsimaffianni pisortaq oqarpoq.
Suleqatigiinneq nutaaq
Kalaalimerngit Danmarkimut nassiunneqassappata nassiussisoq oqartussanit akuersissummik allagartamik piniaqqaartussaavoq, allaqqassalluni oqartussat nerisassat nassiunneqartut akuerisimagaat. Nakorsiartulli angerlarsimaffianut nassiunneqartut arlallit akuersissummik peqartarsimanngillat.
Nassiussuisartussamilli allamik nutaamik suleqateqarnialerput. Maanna Brugseni suleqatigalugu, kalaalimerngit kalaallinit nakorsiartunit piumaneqartaqisut tikisinniarnialerpaat.
Aalisakkat nassiunneqartut pillugit ajornartorsiuteqartoqarsimanngitsoq, Susanne Olsen nassuiaavoq. Neqilli nassiunneqartut, soorlu savat neqaat puisilluunniit neqaat, nakorsiartut angerlarsimaffiannut apuunneqaratik Aalborgip talittarfissuani uniinnartarsimapput.