Nalunnguarfik atuarlugu pisuffissaq
Suleqatigiit namminneq kajumissutsiminnik sulisut Sisimiuni pilersinneqarput. Taakku Nalunnguarfiup sinaa atuarlugu ikaartarfiusamik pisuffiliamik sananiarput.
Suleqatigiinni siuttuupput sisamaasut, Hans Frederik Olsen, Lârsêrak Skifte, Klavs S. Møller aamma Steen Boassen, aamma inuit ataasiakkaat illoqarfimmilu peqatigiiffiit sinniisaat suleqatigiinni namminneq kajumissutsinikk sulisunut nalunaarsimapput.
Suleqatigiit illoqarfimmi innuttaasut eqeersimaarlutik suleqataanissaannut kajumissaarpaat.
– Sisimiormiut anersaavat, tassalu ataatsimoorneq kajumissuserlu, atorlugit illoqarfimmut pitsaasumik iliuuseqarniarpugut. Uani pineqarpoq, Kulturikkut Illorsuup Taseraliup eqqaaniittup Nalunnguarfik atuarlugu pisuffissiamik ikaartarfiusaliornissaq.
– Aput aassimalerniariarpat suliaq aallartinniarparput, taamalu 21-iani inuiattut ullorsipornissarput sioqqullugu suliaralugu naammassiniarsarissavarput. Ikaartarfiusaq innuttaasut illoqarfimmut tunissutigissavaat. Taamaattumik ukioq manna qanoq annertutigisoq suliarisinnaassanerlutigu takussavarput. Ataatsimoorluta angusaqarsinnaaqaagut, ikaartarfiusarlu atorsinnaasunngortissinnaassallutigu, sulia aappaagumut immaqaluunniit aappaaguagumut naammassisinnaassallutigu, suliniummik aallarniisut oqarput.
Suleqatigiit arfininngormat pilersinneqartut ataasinngornermi tullianik Taseralimmi nal. 19.00 ataatsimeqqipput. Suliap allaffissornikkut suliassartaa Juaakka Lyberthip Taseralimmi ingerlanneqarsinnaanissaa ataatsimiittarfimmillu atorsinnaanissaat neqeroorutigisimavaa.