Nammattakkat pingasut kuummi nassaarineqarput
Politiit Kangerlussuarmi kuummi nammattakkat pingasut, norskit pingasut kingullermik juulip 31-ianni takuneqartut pii, nassaaraat.
Kangerlussuarmi politiit kuummi, norskit inuusuttut pingasut Jæren-imeersut maqaasineqarfiisa eqqaani, ataasinngormat ualikkut nassaaraat.
Nammattakkat norskit tamaaneqartut pingasut pigaat. Nammattakkat marluk kuup eqqaani ataaserlu kuummi nassaarineqarput.
Politiit tamaani ujaasinerminnik nangitsinerminni nassaarfik maanna aallaavigilerpaat.
- Nammattakkat qanoq isillutik kuup eqqaanut kuummullu pisimanersut nassuiaatissarpassuaqarsinnaavoq. Naluarput qanoq pisoqarsimanersoq maannalu nassaarfik ujaasinitta nanginnerani aallaavigilerparput, kingullermik takuneqaramik niuffigisimanngisaat, vicepolitimester Morten Nielsen oqarpoq.
Angutinik, juulip 31-ianni aalisariarlutik Kangerlussualiartunik helikopterit marluk ujaasipput.
Angutit inuusuttut pingasut Jæren-imi Hå kommune-meersuupput, taamatut allappoq nrk.no.
Taakkua tassaapput 31-inik ukiulik Jonas Reiestad, Nærbo-meersoq, 24-inik ukiulik Magnar Haarr, Vigrestad-imeersoq, aamma 24-inik ukiulik Tormod Aniksdal, Vigrestadimeersoq.
Ujaarineqartut ilaat marluk siusinnerusukkut Tunumi qissattariarsimapput.
Norskit taakkua pingasut satellittelefoneqaratillu GPS-imik atortoqanngillat.