Gør-det-selv
Nammineq piumassutsimik imerunnaarluni
Misissuinerup nutaap takutippaa imigassamik atornerluisut namminneerlutik atornerluinertik qaangersinnaagaat. Piumassuseqaannassapput
Inuit erloqinartumik imigassamik ajornartorsiutillit katsorsarneqanngikkaluarlutik namminneerlutik atornerluinertik qaangersinnaavaat.
Tamanna anguniarlugu aalajangiinnassapput.
Tamanna takuneqarsinnaavoq Aarhus Universitetimi Center for Rusmiddelforskning-ip misissuinerani.
Centerip qallunaat aanngajaarniutinik atuinerannik misissuileruttorpoq.
Misissuinermi inuit 473-it oqaloqatigisimavaat, tamakkualu oqarput piffissap ilaani imerpallaarsimallutik sulilu imerpallaarlutik.
Taakkuli 78 procentii, inuit 368-it, oqarput katsorsartissimanngikkaluarlutik namminneerlutik atornerluinertik qaangersimallugu imaluunniit annikillisissimallugu - tamannalu taaneqartarpoq self-change:
– Tassani alloriarneq siulleq tassaasarpoq nassuerutigalugu nammineq ajornartorsiuteqarluni taavalu iliuuseqarfigalugu, adjunkt Anne-Sofie Christensen, misissuinermik ingerlatsisimasoq, DR Østjyllandimut oqarpoq.
Taassuma tikkuarpaa self-change iluatsissappat imerajuttut imigassamit allaanerusumik, inuunermik isumaqalersitsisumik, nassaartarsimasut:
– Aatanngorsimapput aananngorsimallutillu, nutaanik ikinngutitaarsimapput imaluunniit nutaamik suliffittaarsimallutik, imigassaq piffissaarussimallugu.
Aamma atuaruk: "Fontain: Qanoruna oqarpit, Gerhardt"
Aamma atuaruk: "Imigassamik atornerluinerup allanngortinnissaa soqutigineqarpianngilaq"
Aamma atuaruk: "Politimesteri: Atornerluineq unammilligassatta annersaraat"
Anne-Sofie Christensenip DR Østjyllandimut erseqqissarpaa self-change isumaqanngitsoq imigassamik atornerluinermut katsorsaariaatsit atorneqartut tamarmik taamaatinneqarsinnaasut, kikkummi tamarmik self-change atorsinnaanngilaat. Isumaqarporli nalinginnaasumik katsorsaariaatsini katsorsaasartut self-change annertunerusumik atorniartariaqaraat.