Namminersorlutik Oqartussani pisortaq nutaaq toqqarneqarpoq
Hans-Peder Barlach Christensenip Naalakkersuisut Siulittaasuata Naalakkersuisoqarfiani pisortatut Søren Hald Møller kingoraassavaa, taamaalillunilu Naalakkersuisut siulittaasuat qanimut suleqatigilissavaa.
Isumaginninnermut Aqutsisoqarfimmi maanna pisortaasoq Hans-Peder Barlach Christensen atorfeqarnermini qaffariarluni Naalakkersuisut Siulittaasuata Naalakkersuiosoqarfiani pisortatut atorfimmi sunniuteqarluartumiilerpoq.
Hans-Peder Barlach Christensen januaarimi 2017-imi Isumaginninnermut Aqutsisoqarfimmi pisortanngorpoq, tassanilu SIK-mi pisortatut atorfimminngaanneerluni.
Atorfilittaq misilittagartooq
Nuup qeqqani Namminersorlutik Oqartussat allaffeqarfianni quleriiaanni qullerpaami atorfilittaq misilittagartooq suliffeqalissaaq. SIK sioqqullugu KANUKOKA-mi pisortatut atorfeqarpoq, taanna Kommuneqarfik Sermersuup kommunit kattuffiannit aninerata kingorna matusariaqarnikuuvoq.
1990-ikkunni Hans-Peder Barlach Christensenip naalakkersuisunut siulittaasoq Lars-Emil Johansen allattaaffigalugu qanimut suleqatigaa. Lars-Emil Johansen Royal Greenlandimi pisortamut tullersortinngormat, Hans-Peder Barlach Christensen naalakkersuisunut siulittaasuusimasumut allatsinngorpoq.
CV-mi tusaamanerluut
Piffissap ilaani inuussutissarsiornermi isumassarsiaq pinngorpoq, taanna Namminersornerullutik Oqartussani kingorna iluatsinnani akisunaarneqarpoq, Hans-Peder Barlach Christensenillu CV-ani tusaamanerluutaalerluni. Tassami taanna ingerlatseqatigiiffimmi Puisi A/S-imi pisortatut atorfinitsinneqarpoq, taanna Nanortalimmi puisimit uuliamik, puisimit pølsenik, puisip usuinik kajumilersitsisunik aamma perlukunik qimminut nerukkaatissanik Kinami niuerferujussuarmut tunisassiorniarpoq.
Kinamiut tunisassianut soqutiginninngitsut paasinarsivoq, ukiullu arlaqanngitsut ingerlareersut, Puisi A/S Hans-Peder Barlach Christensen ingerlatsisoralugu akiliisinnaajunnaarpoq, millioninillu marlunnik kisitsisitalinnik Namminersornerlutik Oqartussat annaasaqaatigaat. Suliniut Jonathan Motzfeldtimut aamma Lars-Emil Johansenimut tusaamanerlulersitsisoq, taakku suliniummik Kujataani suliffeqarfippassuarnik pilersitsinissartik neriuutigisimagaluarpaat.
Atorfiniffissaq
Hans-Peder Barlach Christensen naalakkersuisoqarfimmi pisortatut juunip 12-anni atorfinissaaq.
Taanna nunatsinni peroriartorpoq, Aarhus Universitetimi etmografitut ilinniagaqarpoq kiisalu Henley Management Schoolimi pisortatut ilinniagaqarluni. Hans-Peder Barlach Christiensen 54-inik ukioqarpoq, nuliaraalu Henriette Clasen. Marlunnik inersimasunik meeraqarput.
- HP-p suleqatiginissaa, sivisuumillu pisortani ingerlataqarfimmi kiisalu pingaarutilimmillu sulinermini misilittagarpassuarilersimasai atorluassallugit qilanaaraara. Qularinngilara, HP misilittakkani tunngavigalugit qitiusumik allattoqarfimmi kiisalu Naalakkersuisut Siulittaasuata Naalakkersuisoqarfiani aqutsinermut ineriartortitsinermullu tapeeqataalluarumaartoq, Kim Kielsen taama oqarpoq.
Atorfimmut qinnuteqartut arfiniliusut ilisimatitsissutigineqarpoq.