assit takukkit
Nannunik ilisimatooq ataqqinaammik nersornaaserneqartoq
Erik Born ukiorpassuarni nannunik ilisimatusarsimanini pillugu nunat sineriallit nanoqarfiit Ilulissani ataatsimiinneranni ataqqinaammik nersornaaserneqarpoq
Nunat nanoqarfiit Ruslandip, USA-p, Canadap Norgep Kalaallillu Nunaata tallimassaanik ataatsimiinneranni nunat aallartitaasa pisortaasa nannunut ataqqinaammik nersornaatip siulliup kimut tunniunneqassanersoq aalajangerpaat.
Inassutigineqartunit pingasunit Erik W. Born, seniorforsker aamma dr. filos., Pinngortitaleriffimmeersoq, nunani issittumiittuni ukiorpassuarni nannunik ilisimatusarsimanini pillugu ataqqinaammik nersornaasigassatut toqqarneqarpoq.
Atorfippassualik
Erik W. Born namminersornerullutik oqartussani namminersorlutillu oqartussani nannunut siunnersortaasarsimavoq, inuusuttunik ilisimatusartunik atuartitsisarsimalluni nannunillu ilisimasaminik siammarsaasarsimalluni, Kalaallit Nunaat sinnerlugu nannunut ambassadøriusimalluni issittullu uumassuseqarneranik illersuisuusimalluni.
Tamatuma saniatigut ilisimatooq taanna IUCN-ip Polare Bear Specialist Group-iani 1983-1988-imut aamma 2009-2011-mut siulittaasuusimavoq, aammalu kalaallit canadamiullu nannunik ilisimatusarnermi ataatsimut komitéanni siulittaasuulluni.
Periutsinik nutaanik pilersitsisoq
Aamma Pinngortitaleriffimmit namminersorlutillu oqartussanit nersualaarneqarpoq Kitaani qanga nannunniarnermik piniartunillu ilisimasanik katersuisimanera pissutigalugu, aammalu ilisimatusariaatsitigut maligassiuisuunera pissutigalugu.
Allaaserisap ataani nannunik ilisimatusartup assingi arlallit takusinnaavatit.