Nanortalik: Umiarsuarmi inuttat sila pillugu ilisimatusartussaagaluarput
Umiarsuaq coronamik tunillatsissimasumik inuttalik, ilaatigut sikup pissusia silallu pissusata allanngoriartornera pillugit ilisimatusartunit angallatigineqarpoq.
Umiarsuaq Namminersorlutik Oqartussat ilisimatusartut umiarsuaarigaat oqaatigereeraat, paasinarsimmat tyskip milliardærip nuannaariartaatitut umiarsuarigaat tupigusuutigineqarpoq.
Umiarsuaq Nanortalimmut talikkami inummik coronamik tunillatsissimasumik inuttaqarnera pissutigalugu, aamma mattussimasussaanermut malittarisassat umiarsuarmi malinneqarsimannginnerat pissutigalugu sammineqarsimavoq. Aamma najukkami innuttaasut tunillatsissinnaanerat pissutigalugu.
Suliffeqarnermut, Avatangiisinut Ilisimatusarnermullu Naalakkersuisup Jess Svanep, IA-mi politikkerip Sofia Geislerip apeqqutaasa ilaannut akissuteqaammini, umiarsuarmi inuttat Kalaallit Nunaanni suleriniarnerat oqaluttuaraa.
Ilisimatusarnissaq aallartinneqanngitsootoq
Jess Svane allappoq, Hetairos nammineerluni angalanermut kiisalu ilisimatusarnermut atorneqarnissaanut atatillugu pilersaarutigineqarsimasoq.
- Ilisimatusartut angalanerminnut atatillugu sikup pissusianut silallu pissusiata allannguutaanut atatillugu suliaqarnissaat kissaatigineqarpoq, Jess Svane allappoq, itisiliillunilu allallugu:
- Inummik angallammiittumik Covid-19-mik tunillatsittoqarsimasoq paasineqarmat, angallat mattutissasoq nappaatinut tuniluuttunut ataatsimiititaliarsuarmit naalakkerneqarpoq, taamaalillunilu umiarsuup ilisimatusarnissap pilersaarutaasup ilaa pisinnaajunnaarpoq, piffissami mattusimaffiusumi nunamut ikaartoqaqqusaajunnaarmat.
Nunami allanngutsaaliukkami angalanissamut akuerineqarsimasoq
Jess Svane ilisimatitsivoq, umiarsuaq Kalaallit Nunaata imartaani angalanissarnut Corona pillugu Allattoqarfimmiit akuersissummik pissarsisimasoq. Tmatuma saniatigut Kalaallit Nunaanni Tunup Avannaarsuani nunami allanngutsaaliukkami angalanissamut Namminersorlutik Oqartussanit pissarsisimasoq.
Tassanili ilisimatusartoqartussaanngitsoq.
Nanortalimmi pisup oqartussat umiarsuarnik nunanit allaneersunik tikittoqarnerani malittarisassanik misissuitilersimavai, umiarsuarmi inuttaasut Kalaallit Nunaanni coronamut atatillugu malittarisassanik paasinnissimagunannginnerat pissutigalugu.