Napparsimavik: Ikinnerpaamik qallunaaq ataaseq toqutaavoq

Sri Lankami napparsimaviup pisortaanerata nalunaarutigaa, toqungasut aqqanillit napparsimaviliaanneqarsimasut akornanni ikinnerpaamik ataaseq qallunaajusoq. Sri Lankami aviisi Daily Mirror taama allappoq.

Paasissutissiinerlu qallunaat oqartussaasuinit uppernarsarneqanngilaq.

National Hospital pisortaanerup, Anil Jasinghep aviisimut oqaatigaa, toqutaasut Qallunaat Nunaanni, Polenimi, USA-mi, Kina-mi, Japan-mi, Pakistan-mi, India-mi, Marokko-mi aamma Bangladesh-mi innuttaassusillit toqutaasimanerarpai.

Nunanut Allanut Ministereqarfiup Twitterimini paasissutissiaraa, Sri Lankami qallunaanik toqutaasoqarlunilu aqqunartoqarsimasoq.

Tamannalu suli uppernarsarneqarsinnaanngikkallarpoq, oqaatigineqarpoq.

- Tusarfiit tutsuiginartunit paasitinneqarpugut, (ajunaartut aaqq.) ilaat qallunaajusut, kisianni suli uppernarsaatisinngilarput, Nunanut Allanut Ministereqarfimmeersoq Ib Petersen oqarpoq.

Sri Lankami nunanut allanut ministereqarfiup nunanit allaneersut aqqanillit toqutaasimasut akornanniinnerarpaat, ministereqarfiullu allattorfimaffiini qallunaartaqanngillat.

Pineqartut tassaapput tuluit pingasut, indiamiut pingasut, tyrkiamiut marluk, portugalimiu ataaseq amerikamiullu marluk.

Nunamit allameersut qulingiluat maqaasineqartut, nutaarsiassaqartitsivik AP naapertorlugu ministereqarfik allappoq.

Påskip ulluani oqaluffiit akunnittarfiillu qaartinneqarput. Maannamut 207-it toqunneqarsimasutut nalunaarutigineqarput.