Narsami ulloq atuarfik kingulleq kuugaartuinnaavoq
Nunatsinni tamani atuartut anginerit ullumi naggammik atuarpoq. Aamma Narsap Atuarfiani atuartut
Pingasunngornermi Narsap Atuarfiani atuartut anginerit naggataarutaasumik meeqqat atuarfianni atuarput.
Narsami Sermitsiaq.AG’p tusagassiortua John Rasmussen, oqaluttuarpoq pisarneq naapertorlugu ulloq aallartillugu atuartut anginerit atuartut mikinerit imermik seqqitsarpaat. Siornatigumut naleqqiullugu imeq iibilinik yoghurtimilluunniit akuneqarsimanngilaq. Peqqaataaniillu imeq qilammit sialuttut masannartuliortitsereermat, atuartut mikisut masatsereernikut masannerulaaginnarput.
Nalinginnaasumik ilinniartitsisut atuartullu anginerit atuarfiup eqqaani arsaattaraluarput. Ullumikkulli silarlunnera pissutigalugu sammisaqartitsinissaq illoqarfiup timersortarfianut nuunneqarpoq. Atuartut allunaasamik noqqoruunnermik nalinginnaanngitsumik ilinniartitsisunut ajugaapput arsamillu ilinniartitsisut "mittatigineqarput" 1 - 9'mik ajorsartinneqaramik.
Ukioq manna atuartut anginerit Narsap Atuarfianit soraarummeersussat 26'upput siorna 20'nnaasut.