takornariaqarneq
Narsarsuarmi takornariartitsineq aallartittoq
Timmisartoq Narsarsuarmut toqqaannartoq ukiormanna siulleq ippassaq nal. 12.10 tikippoq. Kujataani takornariartoqarnerup qaammatinik sivisusseqartup aallartinneranut tamanna malunnaataavoq.
Mittarfimmi angalasut hunnorujulikkaat arlaliummata ulapittoqarpoq. Nunaqarfimmi innuttaasut amerlasuut aamma peqataaniarlutik aggerput.
Angalaqqittussat
Narsarsuarmi suliffeqarfiit Blue Ice Explorer aamma Tasermiut Expeditions takornarissanik tikilluaqqusisuupput, angalaqqinnissaannullu isumaginnittuullutik. Disko Linep aamma ilaasussatik tikilluaqquaat, taakkulu bussinik umiarsualivimmut ingerlanneqarput. Tassanngaanniik kommunip illoqarfiinut angallanneqassallutik.
Aammattaaq qulimiguulimmik angallanneqarusuttunut periarfissaqarpoq.
5.000-t mittarfik atortarpaat
Ukiumut inut 5.000 missaanniittut Narsarsuarmi mittarfik aqqusaartarpaat, taakkunannga amerlanerpaat takornariaapput.
Tassanngaanniik umiarsuarnut takornariartaatinukartarput, ukiormannalu inuit 4.000-t missaaniittut umiarsuit quleriarlutik tikinneranut agguataarsimasut angalassapput.