Nathanielsen Wangenheimimut: Inatsisit atuutsinneqarnerinut ministereqarfimmut isumalluutit amerlanerusut kaammattuutigaavut
Naalakkersuisut pingaarnersiuineranut sulisut amerlanerusut sulisariaqartut, Inatsisinik atortitsinermut naalakkersuisup Naaja Nathanielsenip Danmarkimi inatsisinik atortitsinermut ministereqarfimmik ataatsimeeqateqarnermini kaammattuutigaa.
OBS: Inatsisinik atuutsitsinermut naalakkersuisoqarfimmit saaffiginnittoqareersorlu naalakkersuisoqarfimmi suliniutigineqartut allaaserisami ilanngunneqarput. Suliniutit allaaserisami ilanngunneqartut, allaaserisap saqqummerseqqaarnerani ilaatinneqarsimanngillat.
Naalakkersuisut kissaatigisaat Danmarkimi inatsisinik atortitsinermut ministereqarfiup 2023-miit Kalaallit Nunaanni atuutilersinniarsarisaasa ilarpassui suli aallartinneqanngillat. Tamanna Naalakkersuisumut akisussaasumut, ukiup aallartinnerani pingaarnersiuinermut allattorsimaffimmik nassiusseqqeqqammersumut, annertuvoq.
Sermitsiaq.AG-p taamatut nalunaaruteqarnera Anna Wangenheimip (D) qisuariarfigaa, tassanilu Namminersorlutik Oqartussani naalakkersuisoqarfiup Danmarkimilu inatsisinik atuutsitsinermut ministereqarfiup akornanni sulineq Naalakkersuisut qanoq pitsanngorsarniarneraat, inatsisinik atuutsitsinermut Naalakkersuisumut, Naaja Nathanielsenimut (IA), apeqquterpassuarnik nassiussivoq.
Namminersorlutik Oqartussat naalakkersuisoqarfiini atorfilittat inatsisinillu atortitsinermut ministereqarfimmi atorfilittat ataatsimut isigalugu suleqatigiilluartut, Inatsisinik atortitsinermut naalakkersuisoq Naaja Nathanielsen (IA) akissummini nassuiaavoq.
Nunat illuatungeriit tamarmik suliaqassapput
Naalakkersuisut danskit justitsministeriat nunatsinnut sulianik tunngasunik pingaarnersioqqullugu kaammattorneqarsimavoq:
- Kisianni suliniutit, Naalakkersuisunit naammassineqaqqullugit kissaatigineqarsimasut, sivisuallaamik ingerlanneqartarnerat uteqqiattumik Naalakkersuisut naammagittaalliutigisarsimavaat. Ministereqarfimmi isumalluutinik unammilligassaqarneq pissutigalugu inatsisiliornermut tunngasunik suliniutit pingaaruteqarluinnartut pisariaqartinneqartullu kinguartinneqartarnerisa naammaginanngilluinnarnera, kingullermik ukioq manna januaarimi inatsiseqarnermut ministerip Peter Hummelgaard-ip ataatsimeeqatiginerani erseqqissaatigaara.
- Nordatlantkontor-imut isumalluutinik amerlanerusunik ilanngussisoqarnissaa ataatsimiinnermi kaammattuutigaara, taamaalilluni kinguaattoorutit amerligaluttuinnartut ikilisarneqarsinnaaniassammata, Naaja Nathanielsen paragraf 37 naapertorlugu apeqquteqaat naapertorlugu akivoq.
Naaja Nathanielsenillu akisussaaffeqarfiani aamma suliaqartoqalereerpoq:
- Kalaallit Nunaanni eqqartuussiveqarneq pillugu Siunnersuisoqatigiinni sulianik suliarinnittarnerup aamma ataatsimiittarnerit ingerlanerisa sunniuteqarluartumik ingerlanneqartarnissaat tamatuma saniatigut noqqaassutigisimavara, taamaalilluni inatsisit atuutsinneqarnerannut suliassaqarfimmi siumut ingerlanermut ukiumoortumik ataatsimiittarnerit aporfiussanngimmata, kisiannili inatsisit atuutsinneqarnerannut suliassaqarfiup iluani sulianut tunngasunik oqallinnernut attaviit oqalliffiattut pitsaasutut ingerlanneqarsinnaaniassammata. Tamanna ingerlanneqalereerpoq, nassuiaavoq.
Pinerlunnermummi tunngatillugu inatsisit
Naalakkersuisut inatsisinik atuutsitsinerup iluani 2023-mi suliniutit aqqanillit saqqummiuppaat. Ulloq manna tikillugu suliaq ataaseq Inatsisartunut saqqummiunneqarpoq. Suliniutit arlallit suli aallartinneqanngillat.
Naalakkersuisut ukioq manna katillugit arfineq-marlunnik pingaarnersiuisimapput.
Sulinerup pitsaanerulernissaa apeqqutigiinnarnagu aamma Kalaallit Nunaanni Danmarkimisut pinerlunnermut inatsisiliortoqassappat qanoq iliortoqartariaqarnersoq Anna Wangenheimip apeqqutigaa.
Tamanna pinerluuteqarsimasunut inissiisarfinni allannguuterpassuaqartitsissasoq aammalu immikkoortortaqarfinnik matoqqasunik amerlanerusoqartariaqassasoq Naaja Nathanielsen nassuiaavoq. Tamanna aamma isumannaallisaanermut aamma sulisunut pissutsinik allaanerusunik piumasaqaateqarfiuvoq, piffissap sivisuup ingerlanerani ineriartortinneqartussanik.