Niuertarfik oqaluttuarisaanermut ilaasoq illorsuaq pillugu isaterneqartariaqartoq
Kalaallit Nunaanni niuerfinni namminersortut siullersaat - Oles Varehus - bulldozerinit isaterneqassaaq illorsuarlu quleriaanik qulinik portussuseqartoq Grønlandsbankenip aamma Telep illorsuata akornanni Nuup qeqqani sanaartorneqassaaq. Illoqarfiit pingaarnersaanni ingerlatsivik tamatumunnga piareersarpoq.
Sanarfinermut Avatangiisinullu Ingerlatsivik ataatsimiititaliami politikerinut kommunimut pilersaarummut tapiliussamik nassiussaqarpoq, tassanilu akuerineqassappat aamma Aningaasaqarnermut Inuussutsissarsiornermut Ingerlatsivimmi akuerineqassappat, sapaatip-akunnerini arfinilinni maajip naaneranit tusarniaassutigineqassaaq.
Illulioriaaseq ilisarisimaneqartoq
Oles Varehusip inissisimaffiani kommuni sumiiffimmik immikkoortitsivoq, tassaniissinnaavoq illup toqqaviata nalaa pingasunik quleriilik, quleriinnik qulinik inissiaqarfittalimmik ilallugu – sanaartoriaaseq Nuuk Centeri, Grønlandsbanken aamma Telep illorsua assigalugit ilisimaneqartoq.
- Init alliit Imanip tungaanut sammisumik atuisunut siunertalinnut tulluarsarneqassapput, Aqqusinersuullu tungaanut biilit unittarfiat qulisalik. Tamatuma saniatigut inuussutissarsiornermut siunertat, napasuliartaanilu inissiaqarsinnaavoq imaluunnit akunnittarfiit, siunnersuummi tamanna allaqqavoq.
Illoqarfiup qeqqata eqikkarneqarnissaa pilersaarutaavoq, tamannalu ingerlatsiviuk illoqarfiup qeqqanut nukittorsaataasutut nalilerpaa.
- Siunnersuut illoqarfiup qeqqanut uummarsaaqataassaaq illoqarfiullu innuttaasuinut tikeraartunullu assigiinngitsunik sammisaqarfiusinnaallunilu inuussutissarsiutitigut neqeroorutinut pilersitsissaaq, tamanna oqaatigineqarpoq.
Kommunip pilersaarutaanut tapiliussap siunertaasa ilagaat, sumiiffimmi sanaartornissamut silataanilu arealinut attuumassuteqartunut
periarfissanut tunngavissanik aalajangersaasoqarnissaa, taamaalilluni sumiiffimmi ataatsimoortitsineq anguneqassammat.
Oqaluttuarisaaneq eqqarsaatigalugu
- Oqaluttuarisaaneq eqqarsaatigalugu, Oles Varehus najukkami inuiaqatigiinnut qitiujuarsimavoq. Oles Varehus 1951-imi Kalaallit Nunaanni niuertarfiit namminersortut siullersaattut pilersinneqarpoq, taamanikkullu Imaneq illoqarfiup pingaarnertut aqqutigaa, Oles Varehusilu ukiorpassuarni sammisanut qitiusimavoq. Oles Varehusimit assit aamma oqaluttuat Nuup oqaluttuarisaanerani allaatigisarpassuarni atuarneqarsinnaapput. Ukiut 60-it missaat qaangiuttut piniarfik 2012-imi matuvoq, kommunimut pilersaarummut tapiliussamut nalunaarummi tamanna ilisimatitsissutigineqarpoq.
- Sumiiffiup atorneqarnissaanut isumassarsiat nutaat, sumiiffiup sammisanut qitiulerseqqissavaat. ”Oles Varehus Nutaaq” aamma Nuummi illut assiliartarilissagaat
kommunalbestyrelsip naatsorsuutigaa, nalunaarummi tamanna allaqqavoq.
Illoqarfimmi inissaq annertooq, Oles Varehusip aamma Grønlandsbankenip akornanniittoq ullumikkut biilinut unittarfittut atorneqarpoq. Biilit peerneqassapput, taarsiullugu sumiiffik illoqannginnersanngortinneqassaaq, inuillu tamaaniissinnaassapput. Sanaartorfiup nutaap biilit unittarfiannut pisariaqartitsinerup naammassineqarnissaa qulakkiissavaa, pilersaarummi tamanna atuarneqarsinnaavoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...