'Homo Sapienne'
Niviaq Korneliussen: Allakkunnaarneq ajulerpunga
24-iinnarnik ukioqarluni atuakkiortut silarsuaannut Kalaallit Nunaanni Danmarkimilu pulavoq. Ilaatigut Politikenip 2014-imi atuakkiortunut nersornaasiinissaanut toqqarneqartut ilagaat. Kinaavali arnaq inuusuttoq atuakkiaminik ‘Homo Sapienne’-mik iluatsilluarsimaqisumik allattoq?
Sumi tamaani tusarsaavoq - Kalaallit Nunaanni atuakkiortut nutaat ilaat - taamaakkaluartoq Niviaq Korneliussen qanilaartuuvoq oqaluukkuminarlunilu. Sakkortulaartumik assammittarpoq pikkorissutullu pissusilersorluni. Qungujulasuuvoq maniguullunilu. Nipikitsumik sukkasuumik eqqarsaatigilluakkanillu oqaluppoq.
Oqaatsit qarnanit anisut tamarmik eqqarsaatigilluaqqaagaapput. Isai kajortut pissutsimik ersersitsipput, alutornarlutillu.
Niviaq Korneliussenip atuakkiaqqaataa 'Homo Sapienne' oktoberimi 2014-imi saqqummersinneqarpoq, kingornalu ulapissimaqaaq.
– Ukiup affaata ingerlanerani pisoqarsimaqaaq, taamaammat qaammat ilivitsoq qaniginerpaasakka najorlugit Nanortalimmiinnera atorfissaqartissimaqaara, nuannisaqalungalu, atuakkiortoq nuannarineqarluartoq oqarpoq.
Niviaq Korneliussen januaarip naalernerani 1990-imi Nuummi inunngorpoq, Nanortalimmili peroriartorsimalluni. Taamaammat imminut Nanortalimmiusut taagorpoq, aammami Nanortalimmiorpalunnera tusaaneqarsinnaavoq.
Allaaserisaq tamaat uani sapaatit akunnerani Sermitsiami atuaruk. Aviisi uani pisiarisinnaavat: