Niviarsiaqqamut aqqanilinnik ukiulimmut eqqaaniaaneq
Niviarsiaraq aqqanilinnik ukiulik tallimanngornerup unnuaani toqungasoq nassaarineqartoq eqqaaniarlugu, Aasianni innuttaasut tallimanngornermi unnukkut ilaqutariit illuata silataani katersuupput
Aasianni innuttaasut 100-t missaanniittut tallimanngornermi unnukkut 19.30 katersuupput, niviarsiaqqap aqqanilinnik ukiullip ilaqutaannut misiginneqataallutik tapersersuillutillu.
Eqimattat ilaqutariit illuata silataani tussiutinik atuillutillu naneruutinik ikitsipput.
Niviarsiaraq aqqanilinnik ukiulik sisamanngornermi unnukkut nalunaaqutaq 20.00 missaani angerlarsimaffimminit anigami kingullermik takuneqarpoq. Piffissaq eqqorlugu angerlanngimmat maqaasineqartutut politiinut nalunaarutigineqarpoq, tamatuma kingorna kajumissutsiminnik ujaaseqataasut illoqarfimmi ujaasipput.
Nunatsinni Politiit tallimanngornerup unnuaani nalunaaqutaq 01.23 nalunaarfigineqarput, niviarsiaraq silami toqungasoq nassaarineqarsimasoq, angerlarsimaffiata ungasinngisaani.
Ilisimannittussarsiortoqartoq
Suliaq politiinit misissorneqarpoq, tassanilu aamma innuttaasut takusaqarsimagunik imaluunniit paasissutissanik suliamut pingaaruteqarsinnaasunik peqarunik, politiinut saaffiginneqquneqarput.
Pinerluttoqarsimatillugu misissuisartut marluk Danmarkimeersut marlunngorpat Aasiannut tikissapput, tassanilu aamma politiit Ilulissaneersut, Sisimiuneersut aamma Nuummeersut Aasianni suliami misissueqataapput. Pinerluttoqarsimasinnaanera politiit mattutinngilaat.