Noma iluatsilluaqqippoq
Akimasumik neriniartarfiup christianshavnimiittup iluatsitsisimaanera ingerlajuarsinnaarpoq, neriniartarfik ilaatigut umimmaap neqaanik, paarnanik imermillu Kalaallit Nunaanneersunik sassaallertartoq aammaarluni nersorniarneqarpoq.
Imaassinnaavoq Noma Danmarkimi neriniartarfiit sammineqarnerpaartarigaat, tunngavissaqarluarporlumi. S. Pellegrinos-imi nunarsuarmi neriniartarfiit pitsaanersaasa 50-it toqqarneqarneranni naammasseqqammisumi nunani avannarlerni nutaajunerusuni akimasuunik nerisassiortarfik taanna ukioq manna normu 3-nngorpoq. Euro Invest taamak allappoq.
Qaavatigut aamma Noma-p tusaamaneqaataalualersnartoq Chef's Choise-mi nersornaaserneqarpoq. Ajugaasoq neriniartarfinni 60-ini igasuunernit S. Pellegrinos-ip allattugaataani qullersaasunit toqqarneqartarpoq, taamalu igasoqatinit nersorneqarneq pitsassuulluni.
- Qanoq oqassallunga naluara. Neriniartarfimmi sweepstake ingerlassimavarput, uanga nammineq normu 18-inngornissaq eqqoriarsimallugu, aammalu isumalluarnerpaartattaluunniit normu 5-inngornissarluunniit ilimagisimanngilaa, Internetimi aviisi Alt om København naapertorlugu neriniartarfimmi pisortaq René Redzepi oqarpoq.
Noma siorna nunarsuarmi neriniartarfiit pitsaanersaasa normu 10-attut toqqarneqarpoq, taamaattumik Christianshavnimi neriniartarfik qaffaallalluarpoq.
Noma nunat avannarliit nerisassiaannik akimasuunik neqerooruteqartarpoq, taamalu nerisassiassat pitsaanersaat toqqartorsinnaajumallugit Nunani Avannarlerni angalasarsimapput.
Nerisassanut ilaapput hestemuslingit, assagiarsuit itisoormiut jomfruhummerillu savalimmiuneersut; Skyr, nataarnat, kapisillit, saarulliit aamma sulluitsut islandimiit, kiisalu savaaqqat, umimmaat, paarnat imerlu Kalaallit Nunaanniit.
Neriniartarfik nammineq pujoorisarpoq, tarajorterisarluni iffiortarlunilu, aamma nammineq seernartuliortarlunilu kissaallaliortarluni. Aamma namminneq oqarnerattuut akimasuunik neriniartarfinnut allanut sanilliullutik puuguttat immernerusarpaat.
Noma Københavnimi Christianshavnimiippoq. Ikerasaliat avatangiisigalugit Christianshavnimilu illutoqqat neriniartarfimmut akimasuumut taamaattorli nuimanngitsumut avatangiisiisuupput. Menu arfineq-marlunnik nerisassartalik 900 kr.-eqarpoq, viinnillu iggisissat tassunga atasut 850 kr.-eqarlutik.