Uuliakoortoqareersoq
Norskit uuliamik qilleriavianni qallunaat akerliuniartut peersinneqartut
Danskit pingasut Greenpeace-meersut Norgemi uuliamik qillerivimmiittut Norskit politiivinit ataasinngornermi peersinneqarput
Uuliasioqatigiiffiup ExxonMobilep Norgemi qilleriviani illoqarfimmi Ølenimi akerliuniartut 14-it qillerivimmit Norskit politiivinit peersinneqarput. Peqataasuni pingasut qallunaajupput. Tamanna ataasinngornerup ullaavani pivoq.
Issittumi akisussaasoq Jon Burgwald Ritzau-imut oqarpoq.
- Qillerisoqarnissaanik akerliusut eqqissisimasumik peersinneqarput, Jon Burgwald oqarpoq.
Qillerivik West Alpha illoqarfimmi Ølen-imiittoq akerliunianit qaqiffigineqarpoq. Uuliasioqatigiiffiup ExxonMobilep qilleriviutigineqarpoq, uuliasioqatigiiffik Ruslandip Issittup Imartaani uuliamik qillerinissamik pilersaaruteqarpoq. Tamanna akerliuffigalugu qillerivik Norgemiittoq qaqiffigineqarpoq.
Ukiut 25-it matuma siorna Issittup Imartaani uuliasiortoqarnerani ajutoortoqarpoq, ExxonMobilelilu uuliamik qillerinissani septembarimiussasoq naatsorsuutigaa. Uuliasiornermi ajutoortoqaqqissagaluarpat annertuumik ajoqqusiisinnaasoq Greenpeace-mit aarleqqutigineqarpoq.
- Pinngortitami asseqanngitsumi uumasoqarfiusumilu uuliasiortoqalernissaa ernumanaateqarpoq akisussaassuseqanngitsuullunilu. Uumasut toqqissisimasumik maannakkumut uumanerat attatiinnarneqartariaqaraluarpoq.
1989-imi uuliasiortoqarnerani ajutoortoqarpoq, 40.000 tons uulia asimut seeraluni 2000 kilometerinillu isorartutigisumik malunnaateqarluni, allaat Alaskami malugineqarsinnaalluni. Uuliasiorluni ajutoortoqarnerani uuliasioqatigiiffik ExxonMobile aaqqissuinissamut 2 milliard koruunit atorpai.
Taamaakkaluartorli uulia seerisup 7 procentiinnaa qaqinneqarpoq, ullorlu manna tikullugu suli uuliakoorfik takussaalluni.