perorsaasut
NPK: Perorsaasunik amigaateqarneq nammineq pisuussutaasimasinnaavoq
Nunatsinni Perorsaasut Kattuffianni siulittaasup Naussunnguaq Bisgaardip Kommuneqarfik Sermersuumi perorsaasunik amigaateqarneq tupaallaatiginngilaa, Kommunilu perorsaasut suliffinniit qimarrannerannik paasiniaalluni misissuillaqqullugu.
Nunatsinni Perorsaasut Kattuffianni siulittaasup Naussunnguaq Bisgaardip NPKimi ilaasortat 400sut ilaat Nuummi Kattuffiup allaffianit ullormut attaveqarfigisarpai.
Aqutsineq ajunngitsumik ingerlava?
Tassuma tupaallaatiginngilaa Kommuneqarfik Sermersuumi ilalumi nuna tamakkerlugu perorsaasunik amigaateqartoqarmat.
- Meeqqerivinni pineqartuni Nuummi perorsaasut amigaatigineqartartigisut, sooruna taamaattoq? Kommuneqarfik Sermersuumi misissuisoqarpa meeqqerivinni aqutseriaaseq suunersoq? Qanoruna aqutsisoqarmat sulisut sivikitsuinnarmik suleriarlutik allamut nuuttartut? Naussunnguaq Bisgaard misissueqqusilluni oqarpoq.
Sermitsiaq.AG-imi eqqaaneqartutut perorsaasutut atorfiit 104-nit 52-it inuttaqanngillat.
Aamma atuaruk: Perorsaasut ilungersunartumik annertuumik amigaatigineqartut
Nunatsinni perorsaasut kattuffianni ilaasortat suliffimmi atukkatik uparuarnartut pillugit ullut tamaasa saaffiginnittarput.
Sumi allaqqagami?
- Perorsaasoq saaffiginnippoq, aqutsisumit sulinermi nalaani 29 minutsit pausernermini suliffini qimaqqusaanngikkaa, taamaaliussaguni akissarsiaminit ilanngaatsissagami, tamannalu isumaqatigiissutini sumi allaqqanersoq paasiumavaa, Naussunnguaq Bisgaard Nuummi sulisut atugaanik assersuuteqarluni oqarpoq
Perorsaasutut ilinniarsimasup naammasserlaap qaammammusiai aapriilip aallaqqaataanit 2017-imit 20.104-kroneupput. Sulinerminnilu piumasaqaatit amerliartuinnarput.
Ataatsimiinnerpassuit
- Perorsaasut angajoqqasnik ataasiakkaarillutik ataatsimiisitsisassaput, meeqqat immikkut ineriartornerat pillugu nalilersuillutik, aqutsisullu suliami saniatigut ukiumut nalunaarusiortartussaatitaapput meeqqeriviit pillugit, Naussunnguaq Bisgaard oqarpoq. Akissarsiaasalu ukiorpassuarni annikissimaneri perorsaasussaaleqinermut patsisaasut oqaatigaa.
Nuummi atorfiit 104-nit 52-it inuttaqannginnerinut inissaaleqineq aamma patsisaaqataanerarpaa.
Atorfinnut inissaq
- Aqutsisutut atorfinnut inissaq neqeroorutigineqartarpoq, perorsaasutut atorfinnuunngitsoq, Naussunnguaq Bisgaard oqarpoq kaammattuillunilu perorsaasutut atorfinnut inissaq neqeroorutigineqaqqullugu Nummi inissaaleqisoqarmat.