Nunanut allanut ministeri allakkat ilumuunngitsut pillugit: Ajortumik oqallitsitsiniarneruvoq

Qinersinermik sunniiniarluni ilumuunngitsunik nutaarsiassiisarneq siusinnerusukkut sammineqangaatsiartarsimavoq. Nunanulli Allanut Naalakkersuisumit Ane Lone Baggerimit Amerikami senatorimut Tom Cottonimut allagaritittuusaarneqartut takutippaat, eqqunngitsunik paasissutissiisarneq annertunerujussuarmik eqquisinnaasoq. Nunanut allanut ministeri Jeppe Kofod (Soc) Venstremi nunanut allanut ataatsimiititaliami ilaasortaatitamut Michael Aastrup Jensenimut akissuteqarluni taamatut allappoq.

Venstremi politikkerip paaserusussimavaa, Danmarkimi naalakkersuisut taamatut saassusseqqittoqarsinnaanera pinaveersaartinniarlugu qanoq iliuuseqarniarnersut.

- Allakkamut pineqartumut tunngatillugu siusinnerusukkut erseqqissaatiginikuuara, erseqqilluinnarmat allakkat ilumuunngitsuusut, allagaqarsimasullu anguniagaa pinngitsoortinniarlugu allakkat alaannarneqartariaqartut. Siunertarisimavaami tunngavissaqanngitsumik malugeqquneq ajortumillu oqallitsitsiniarneq, Jeppe Kofod allappoq.

- Ataatsimut isigalugit, ukiuni kingullerni oqartussaaqatigiilluta ingerlatsinitsinnik tatiginnikkunnaarsitsiniarluni sunniiniartoqarnerulersimanera maluginiarsimavarput. Taamatut ingerlatsisoqartalernera ernumanartupilussuaq naalakkersuisuni pimoorulluinnarlugu tiguarput.

Akiuiniartarneq nalilersorneqassasoq

- Suliniutit arlallit 2017-imili isumagineqarsimapput, taamaalilluta sunniiniartoqarneranut inuiaqatigiittut siusinnerusumut naleqqiullugu ullumi akiuunnerulersinnaasimavugut. Sulissat susassaqarfiit akimorlugit suleqatigiissitamit ataqatigiissarneqartarput, suleqatigiissitaq Justitsministeeriaqarfimmit, Udenrigsministeeriaqarfimmit, FE-mit PET-imillu inuttaqarpoq.

- Sunniiniartarnerit qinersinerinnarmut tunngassuteqarneq ajorput. Allakkat ilumuunngitsut tassunga assersuutissaalluarput.

- Taamaammat misilittakkat ilinniarfiginiarlugit aamma siunissami suliassat pitsaanerpaamik aaqqissuuttarniarlugit, sunniiniartarneq akiorniarlugu sulisarneq nalilersuleruttorparput. Nuna tamakkerlugu suliaqartarneq ulorianartorsiortitsisumut naapertuutsilerniarlugu qanoq naleqqussaasinnaanitta misissorneqarnerata saniatigut, sunniiniartarnerit assigiinngitsutigullu aarlerisaarisarnerit allat iliuuseqarfiginiarlugit EU-mi NATO-milu iligisatsinnik suleqateqarnitta annertusarneqarnissaa uannut pingaaruteqarpoq.