Gambling
Nunarput Danmarkilu akisussaajumanngillat
Kalaallit Nunaata akisussaaffik selskabiniitippaa. Uuliamik ujaasilluni qillerinerit ulorianaatillit Villy Søvndalip unitsittariaqarpai, Greenpeace isumaqarpoq
Nunatta imartaani uuliaarluertoqassagaluarpat uuuliamik saliinissamut Kalaallit Nunaat upalungaarsimanermut pilersaaruteqanngilaq. Kalaallit Nunaanni Aatsitassanut Aqutsisoqarfiup uulisioqatigiiffiit akisussaatippai, tamakkua qularnaveeqqusiissallutik 60 mia. koruunit angullugit amerlassusilinnik.
Greenpeaceli malillugu qularnaveeqqutit naammaqqajanngillat Kalaallit Nunaanni annertunerusumik uuliaarluertoqassagaluarpat. Uuliamik ajutoornerup iliuuseqarfiginissaanut inatsisitigut akisussaaffik Kalaallit Nunaata Danmarkillu avissimavaat. Selskabip akisussaasup uumassuseqarneq sunnertiasoq iluarsineqarsinnaanngitsumik ajoquserneqartoq nammineq iliuuseqarfigisinnaanngippagu Kalaallit Nunaat upalungaarsimanngilaq Danmarkilu naammanngilluinnartumik upalungaarsimanermut pilersaaruteqarpoq.
Taamaattumik ajornartorsiutaavoq Danmarkip Kalaallit Nunaanni avatangiisinut akisussaaffini qimarratigimmagu, Greenpeace tusagassiorfinnut nalunaarummi allappoq.
Qallunaat upalungaarsimanermut pilersaarutaatigut uuliamik aniasoqaraluarpat annerpaamik uulia 5.000 tons qallorneqarsinnaavoq, immikkulli ilisimasallit malillugit imaani ilulialimmi ajutoortoqarpat uulia ullormut 30.000 tonsi aniasinnaavoq.
– Kalaallit Nunaanni uuliamik aniasoortoqassappat tamanna akisussaaffigineqarumanngilaq. Danmarki Kalaallillu Nunaat imminnut akisussaatinniaqattaapput, ajutoortoqassappalli upalungaarsimanermut pilersaarummik atorsinnaasumik arlaannaalluunniit peqanngilaq. Ernumanartoqartorujussuuvoq Issittumi avatangiisinut Danmarki mianersuaatsumik ilatsiinnartumik politikkilersormat, Greenpeacemi qallunaat issittumut suliniuteqarfianni pisortaq Niels Fuglsang oqarpoq.
– Maanna paasinarsimmat Kalaallit Nunaat upalungaarsimanermut pilersaaruteqanngivissoq, akisussaaffilli selskabinut tunniullugu, nunanut allanut ministerip Villy Søvndalip sulissutigisariaqarpaa uuliamik ujaasiluni qillerinerit ulorianartullit unitsinneqarnissaat, Namminersorlutillu Oqartussat qillerinissamut akuersissutinik tunniussisarnera isornartulimmik apeqquserlugu. Piffissanngorpoq taassuma qallunaallu naalakkersuisuisa akisussaaffimmik tigusinissaat, minnerpaamillu Kalaallit Nunaanni avatangiisinut isumannaatsuuneq qulakkeerlugu, akisussaaffik qimarratiginagu.