Nunarsuarmi eriagisassatut siunnersuutit nutaat
Nunarsuarmi eriagisassanik aalajangiisartut sumiiffiit qulingiluat toqqarneqartussatut siunenrsuutigaat - ilaatigut nunatsinniit.
Ingammik takornariaqarnerup iluani maluginiarneqarsimavoq Ilulissat Kangia ukiut matuma siorna FN-imi Unescop nunarsuarmi eriagisassatut toqqarmagu. Immaqalu nunatsinni sumiiffiit allat ilanngunneqassapput, Egyptenimi pyramidit, Kinami qarmarsuaq Grækenlandimilu Akropolis peqatigalugit.
Atuagassiaq Politiken naapertorlugu Issittumi ukiumi 1.000-ni nunalerisuuneq, piniarfiit soorlu Aasivissuit Arnangarnullu Qoorua ukiualuit taakkununnga ilanngussassasut siunnersuutigineqartut. Kikkut kingorna toqqarneqarumaarnersut eriagisassatut naliliisartut 21-usut ukiumut ataasiarlutik naapittartut aalajangerumaarpaat. Toqqaasoqartinnagu nunarsuarmi tamarmi immikkut ilisimasallit toqqarneqartussanik nalileeqqaartarput.
Nunatsinni sumiiffiit amerlanerit toqqarneqassappata pimoorullugu suliniuteqarnissaq pisariaqarpoq - soorlu Ilulissat kangianut tunngatillugu taamaattoqarsimasoq. Nuanrsuarmi eriagisassat nakkutigineqaqqissaartarput kinguaassat eqqarsaarigalugit, ukiunilu kingullerni piumasaqaatit sakkortusisimapput.