Nunarsuatsinni atuipilunnerup ullua
Nunarsuatsinni atuipilunneq ukiut tamaasa nunanit tamanit malunnartiniarneqartarpoq. Ulloq nunarsuarput artukkerlugu atuipiluffiusoq malunnartinniarneqartarluni
2010-mi aggustip 21-at taamatut malunnartinneqarpoq, ukiullu tamaasa ulloq siusinnerujartuinnarluni. Taamatut ingerlaannartoqarsinnaanngilaq, qanorliuna taamatut ineriartorneq unikaallatsinniaripput?, Nunani Avannarlerni ministerit ataatsimiinnerat naammassimmat Avatangiisit pillugit ministereqarfik taamatut allappoq.
Ukiuni tulliuttuni silap pissusaata allanngoriartorneranut apeqqutit pillugit mingutsitsinanilu periuseqartarneq pillugu Nunat Avannarliit nunarsuatsinni siuttuunissaminut periarfissaqarput.
Palle Christiansen, Iliniartitaanermut, ilisimatusarnermut kiisalu Nunanut Avannarlernut Naalakkersuisoq ataatsimiinnernut peqataasoq imatut ilassuteqarpoq:
- Uagulli suli pitsaanerusumik angusaqarsinnaavugut. Inuit ataatsikkut angallassinnaanerat aqqutissiuuttariaqarparput assartuinermilu nukissiuutit mingutsitsissutaanngitsut atulernissaat qulakkeerniarlugu sulissuteqarniartariaqarluta. Atuisartut mingutsitsissutaanngitsunik qinigaqarsinnaanerat periarfissarsiuuttariaqarparput, soorlu Nunat Avannarliit Qussummik Matuersaaserfimmillu meqqiliisarnerat kiisalu suliniut Nunani Avannarlerni Nerisassat Nutaat aqqutigalugu.
- Tunisassiortut atuisartullu atugassatut qinikkamik mingutsitsissutaanerat suli akilertassavaat, taamatut mingutsitsineq killilersimaarneqarsinnaammat, teknologi-llu mingutsitsissutaanngitsoq ineriartortinneqartuarsinnaaniassammat.
- Nunarsuatsinni amerliartuinnartunik inulimmi ikiliartuinnartunillu atugassaqartitiffiusumi, pitsaasumik periuseqarnissaat anguniarlugu, meeqqat ilinniartinneqarnerat isumagisariaqarparput. Anguniakkat annertuut merserinagit anguniartariaqarpagut. Kalaallit Nunaanni Nuuk nunarsuatsinni illoqarfiit pingaarnersaattut siullersaalluni CO2-mik mingutsitsiffiunngitsutut inissinnissaa siunniunneqarpoq, Nunanilu Avannarlerni ministerit siunnersuisooqatigiiffiat ungasinngitsukkut unammisitsilerput, Nunani Avannarlerni kommunit akornanni mingutsitsinginnerpaaq toqqarniarlugu, Palle Christiansen oqarpoq.