Nunatsinni innuttaasut ataatsimiinnerat aallartippoq

Illoqarfiup qeqqani Nuuk Playgroundimi scenemit innuttaasunik ataatsimiititsineq nutaaq, Qassimiuaarneq, ullumi marlunngornermi aallartinneqarpoq.

Innuttaasut ataatsimiinnerat kikkut tamarmik nettikkut, aaqqissuussisut nittartagaatigut malinnaaffigisinnaavaat.

Toqqaannartumik malinnaagit

Tassani oqallinnermut malinnaassagaanni isiginnaartunullu allanut allassagaanni ateq allanneqaqqaassaaq.

Ataatsimiinnerup ulluani siullermi silagissorsuunngilaq, pisussarpassuaqarporli.

Scenemit pingaarnerusumit oqalugiassapput borgmester Asii Chemnitz Narup (IA) SIK-llu siulittaasua Jess G. Berthelsen, siullermilli erinarsortoqarlunilu qitittoqassaaq.

Aalisakkat pillugit oqallinneq

Tamatuma kingorna aalisakkanik suliffissuit oqaluuserineqassapput. Tassani sammineqassapput aalisakkanik suliffissuarni sulisut inuusuttut nalinginnaasumillu ineriartorneq.

Oqallitsitsisuussaaq Inga Dora Gudmundsdottir Markussen, peqataassappullu Haukur M. Gestsson, Iceland Ocean Clus Housemeersoq aammalu Royal Greenlandimit Jens K. Lyberth, KNAPK-mit Henrik Sandgreen, Nusukamit Gerth B. Lynge aammalu Aalisarnermut Naalakkersuisoqarfimmit Emanuel Rosing.

Ullo´qeqqasioreernerup kingorna meeqqanut pisoqartitsissaaq MIO aaqqissuussisoralugu.

Kalaallit Nunaata Siunissaa

Ualikkut inuusuttunut isumassarsutitut sammitinneqassapput filmit kulturilu. Tassani Sume-kunnik pilersitseqataasoq Emile Hertling Peronard Qassimiuaarnermut qaaqqusatut peqataassaaq.

Aamma inuusuttut Sisimiuneersut takutitsissapput, taakkualu piviusulersaarut Kalaallit Nunaata Siunissaa qanittukkut sanasimavaat, aammalu Danmarkimi kalaallit ilinniagaqartut Uninnak-meersut aamma Sumut-meersut saqqummiussissapput.