Nunatsinni Nakorsaaneq: Nammineq laboratooriami misissuisalissaagut
Ilisimasallit marluk Kalaallit Nunaannukangajalerput. Taakku Kalaallit Nunaanni nammineq laboratooriaqalernissaq qulakkiissavaat, taamaalilluni nunami Covid-19-imik tunillatsittoqarsimanersoq misissuisoqarsinnaalissaaq
- Maani Kalaallit Nunaanni misissuisarfimmik pilersitsinissaq pillugu suliffeqarfik ataaseq ippassaq isumaqatigiissutitsinnik atsioqatigaarput. Peqatigitillugu allamik misiliiniarpugut, misisuinermi atortut testkitsinik taaneqartartut ajornannginnerusumik atorneqarsinnaasut pisiariniarpavut, Danmakimilu Lægemiddelstyrelse qinnuigisimallutigu, Kalaallit Nunaat salliutinneqassasoq, Nunatsinni Nakorsaaneq tallimanngornermi tusagassiortunik katersortitsinermi oqarpoq.
- Lægemiddelstyrelsen naalagaaffeqatigiit iluanni nassiussuisarnermut sunniuteqartartarpoq. Atortussalli suli tikinngillat, nakorsaaneq ilisimatitsivoq.
Amerikamiut atortui
Atortussat taakku marluk tamarmik USA-mi sanaajupput.
- Nunalu nammineq ilisimaneqartutut annertoorujussuarnik unammilligassaqarpoq. Taamaammat Atlantikoq qulaallugu qaqugu nassiusissanersut oqaatigiuminaappoq, Nunatsinni Nakorsaaneq oqarpoq, nangillunilu:
- Tamannalumi aamma pissutaavoq, covid-19-mik misissuisarniarluta nammineq laboratooriartaarniarluta suliniuteqalernitsinnut. Ilisimaarilluarparput arlaatigut kingunerluuteqarsinnaasoq. Pilersaarutaavorli, ullualunnguit ingerlaneranni ilisimasalinnik marlunnik maanga tikisitsinissaq, Henrik L. Hansen ilisimatitsivoq.