Nunatsinni sakkutuunngorniarfeqalernissaa Atassummit anguniarneqarpoq
Folketingimut qinigassanngortittup Bentiaraq Ottosenip Nunatsinni sakkutuunngorniarfeqalernissaa qineqqusaarutigaa. - Inuusuttut pissutsinut malinninnerulernissaannik kinguneqalersinnaavoq, oqarpoq
Kalaallit Nunaanni sakkutunngorniarfeqartariaqalerpoq.
Atassut sinnerlugu Folketingimut qinigassanngortittoq taama isumaqarpoq.
- Siunnersuut silaannarmit tiguneqanngilaq. Tamanna partiip iluani oqallisigereerparput, Folketingimilu ilaasortaatitaqalissagutta tamanna piviusunngornissaa anguniassavarput, Sermitsiaq.AG-mut oqarpoq.
Nunatsinni sakkutuunngorniarfeqalissappat iluaqutissarpassuaqartoq isumaqarpoq.
- Ilaatigut inuusuttorpassuarnut ingerlariaqqissimanngitsunut iluaqutaasinnaavoq, inuusuttorpassuimmi meeqqat atuarfiat naammassereerlugu ingerlariaqqinngitsoornikuupput. Taakkununnga una periarfissaalissaaq ingerlariaqqinnissamut, pissutsinut malinnaanerulernermik aamma pilersitsisinnaavoq, ilinniaqqinnissamut iluaqutaasinnaassalluni, oqarpoq. Nunatsinni sakkutuunngorniarfiup Danmarkimit aqunneqassasoq oqaatigaa, sakkutuunngorniarfik Kalaallit Nunaanni immikkoortortaqarfeqassasoq siunnersuutigalugu.
- Sakkutuunngorniarfik sumiissanersoq suna siunnersuutigisinnaaviuk?
- Kangerlussuarmi timmisartukkut immikkoortortaqarfik inissisimasinnaavoq, imaatigut sakkutooqarfinngorniarfik Kangilinnguani inissisimasinnaalluni, Bentiaraq Ottosen akivoq.