Nunatta EU-mut ilaasortanngorsinnaanera oqallisigineqarli
Kalaallit Nunaata EU-mut ilaasortanngorsinnaanera pillugu siammasissumik oqallittoqarnissaa IA-p kissaatigaa.
IA-p folketingimut ilaasortaatitaata Juliane Henningsenip inatsisileritooq qinnuigisimavaa Kalaallit Nunaata EU-mut ilaasortanngorsinnaanerani periarfissat nalilersoqqullugit.
- Savalimmiormiu politikeri Høgni Hoydal uangalu inatsisileritooq Ole Spiermann qinnuigisimavarput, Savalimmiut Kalaallit Nunaatalu EU-mut ilaasortanngorsinnaaneranni iluaqutissat ajoqutissallu misissoqqullugit. Suut piviusuunersut suullu oqaluttuaannaanersut paasiniarlugu, taamaaliornikkut EU-mut ilaasortanngorsinnaanermut periarfissat pillugit siammasissumik oqallittoqarsinnaassammat, taamak folketingimut ilaasortaq Juliane Henningsen (IA) AG-mut oqarpoq.
Inatsisilerituup Ole Spiermannip akissut tunniuteereersimavaa, kisianni Juliane Henningsenip akissutip qanoq imaqarnera oqaatigerusunngilaa. Taanna Savalimmiuni Kalaallit Nunaannilu ataatsikkut saqqummersinneqassaaq. Qularnanngitsumik upernaap ingerlanerani.