Nutaarmiuni toqutsisoq Danmarkiliassaaq
22'nik ukiulik februaarimi Nutaarmiuni inunnik pingasunik toqutsisoq misissortissaaq
22'nik ukiulik Kunuunnguaq Korneliussen, Nutaamiuni februaari qaammat inunnik pingasunik toqutsisoq aamma inunnik sisamanik toqutseriaraluartutut unnerluutigisaq, pisuussuteqarnerminik akuersaarnikoq Risskovimi Retspsykiatrisk Ambulatoriumimi piffissami aggersumi tarnimigut misissortissaaq.
Taama ilisimatitsivoq Qaasuitsumi Politiit, Niels Erik Nymark Jensen.
- Unnerluunneqartup Nutaarmiuni iliuuseqarnermini nalaani eqqarsartaatsimigut qanoq innera misissorneqassaaq. Misissuinermit paasisat tunngaviliisussaammata unnerluussap pineqaatissinneqarnissaanut, pisuutitaassagaluaruni, Niels Erik Nymark Jensen Radioavisimut oqarpoq.
Apeqqutaalersorlu tassa Kunuunnguaq Korneliussen pilaatisinissaminut naleqquttuunersoq nalilissallugu, imaluunniit nakorsat immikkut pikkorissarsimasut nalilissagaat unnerluussaq tarnikkut katsorsartariaqartoq.
Upernavimmi Eqqartuussiviup unnerluussap maaji aallaqqaataa tikillugu tigummineqarallarnissaanik sivitsuivoq.