Nuugaatsiaq
Nuugaatsiami pigisat aaneqarsimalerput
Issittumi Sakkutooqarfiup Nuugaatsiami innuttaasut pigisaasa pingaarnersaat aasimalerpaat
Issittumi Sakkutooqarfimmiut holdit sisamannorlutik ullaarnganiik unnuaqeqqata missaa tikillugu ulappupput.
Issittumi Sakkutooqarfiup Qaasuitsup Kommuniani upalungaarsimasuutitat peqatigalugit Nuugaatsiami illut 24-t misissorsimavaat, tassani innuttaasut pigisaat pingaarnerit soorlu, kalaallisuut, pinnersaatit, assit aallaasillu katersorneqarsimallutik.
- Suliaq sivisoqaaq, hold-immi sillimaniarneq pillugu nakkutiginnittuartariaqarsimapput. Illut ilaat nakkaativissimapput ilaalllu sukarsuarminit nikissimallutik, Issittumi Sakkutooqarfiup tusagassiisarnermut sulisua Jette Elkjær oqarpoq.
Illut taakku 24-t Issittumi Sakkutooqarfimminngaanneersunit upalungaarsimasuutitanilli iserluni pigisanik ujaasiffigineqarnissaat piginnittaanit akuersissumik pissarsiffigeqqaarsimavaat. Akuersissutigineqarsimasulli tamarmik iserfigineqarsimapput.
Najugaqartut pigisaminnik tigoqqikkusutaminnik allattuitinneqarsimapput.
Ullumi Vædderinip pigisat Uummannamukaappat, tassanilu Qaasuitsup Kommunianut tunniunneqarlutik.
- Taakku illu suminngaanneerneri tamarmik nalunaaqutsersorneqarsimapput, pigisalli tunniunneqarnissaat kommunimit isumagineqassaaq, Jette Elkjær oqarpoq.
Aqagu ullaatugaani Illorsuarni illut misissorneri aallartinneqassaaq. Tassanilu illut ikinnerummata aserornissaallu aallerinannginneri pissutigalugu sulineq sivikinnerusumik pissasoq, Jette Elkjær naliliivoq.