Nuummi anorersuaq
Angallatit marluk umiarsualivimmi pitussimasut pituutaarput. Nuummi Qatserisartut aappaa annappaat
Arfininngornerup sapaatillu unnuaani nal. 3.30 miss. kujasimmik anorersuaq Nuummut pitaruppoq. Anorip sukkassusaa 17,7 m/s tassanngaannaq 37,5 m/s'inngoriasaarpoq.
Anorersuup tikiunnerata ilaatigut nassataraa Blok 17'ip silataani iikkamut assiutit katagaallutik silaannakkoornerannik.
Aamma Blok T'p qaliata ilaa tingippoq blokkip eqqaanut nunamut tulluni. Tupinnaannartumik biilit blokkip eqqaani uningasut ataasinnguarluunniit eqqorneqanngilaq.
Umiarsualiviup imartaani pitutsivinnit angallatit marluk pituutaarput. Aappaa baylineri angisooq kangerluup iluani umiatsiaaqqat pitoqqasarfiata iluanut tipivoq baylinerilu - Nuummi Qatserisartut suliniapallannerisigut eqqarsaatigilluakkamillu iliuuseqarnerisigut pitunneqarluni - ajoqquserani. Angallatip aappaa, angallassissut pisoqalisoq sungaartoq, amutsiviup talittarfianut kallussaattoq qanoq iliuuseqarfigineqarsinnaanngilaq.
Borgmesterip Anniitap Aqquserngani, Qinngutsinnut aqqutaani qulliup napparutaa ataaseq uppippoq.
Qinngutsinni kommunip meeqqanut meeraaqqanullu paaqqinnittarfissaa qisuusoq sanallugu aallartitaq, aamma anorersuarmit uppisinneqarpoq.